മദ്യദുരന്തം: കുറ്റപത്രം ഇന്ന്
കൊല്ലം: കൊട്ടാരക്കര, കല്ലുവാതുക്കല്, പള്ളിപ്പുറം മദ്യദുരന്തക്കേസില് ജനവരി 22 തിങ്കളാഴ്ച കുറ്റപത്രം നല്കും. പരവൂര് മുന്സിഫ് മജിസ്ട്രേറ്റ് കോടതിയിലാണ് കുറ്റപത്രം നല്കുക.
ഐ.ജി. സിബി മാത്യുവിന്റെ നേതൃത്വത്തിലുള്ള പ്രത്യേക അന്വേഷണ സംഘം ഇതേ വരെ 47 പ്രതികളെ കണ്ടെത്തിയിട്ടുണ്ട്. ഇതില് നാലു പേര് സംഭവസമയത്തു മരിച്ചുപോയി. മൂന്നു പേര് ഒളിവിലുമാണ്. ബാക്കിയുള്ള 40 പേര്ക്കെതിരെയാണ് തിങ്കളാഴ്ച കുറ്റപത്രം സമര്പ്പിക്കുക.
മണിച്ചന്, ഭാര്യ ഉഷ, സഹോദരന്മാരായ കൊച്ചനി, വിനോദ് കുമാര്, ബന്ധുക്കളായ സുഗതന്, ശ്രീകണ്ഠന്, മദ്യം വിതരണം ചെയ്ത ഹയറുന്നീസ, ഭര്ത്താവ് രാജന്, സഹായി രാജു തുടങ്ങിയവര് പ്രതികളില് ഉള്പ്പെടും. ഇതില് പലരുടെയും പേരില് കൊലക്കുറ്റമാണ് ആരോപിച്ചിരിക്കുന്നത്.
ഇന്ത്യന് ശിക്ഷാ നിയമം 302ാം വകുപ്പുപ്രകാരം കൊലക്കുറ്റം, 307 പ്രകാരം കൊലപാതകശ്രമം, 328 പ്രകാരം വിഷം കൊടുത്തു പരിക്കേല്പിക്കല്, 102 ബി പ്രകാരം ഗുഢാലോചന എന്നീ കുറ്റങ്ങളാണ് ഇവരുടെ മേല് ചുമത്തിയിരിക്കുന്നത്. ഇതിനു പുറമെ നിയമവിരുദ്ധമായി മദ്യം സൂക്ഷിക്കുക, വില്ക്കുക, ഇതിനായി ടാങ്ക്, കുപ്പികള്, കവറുകള് എന്നിവ കരുതിവെക്കുക, സ്പിരിറ്റില് വിഷം ചേര്ക്കുക എന്നീ കുറ്റങ്ങള് മണിച്ചന് ഉള്പ്പെടെയുള്ള പ്രധാനപ്രതികള്ക്കെതിരെ ചുമത്തിയിട്ടുണ്ട്.
മണിച്ചന്റെയും കൊച്ചനിയുടെയും ചിറയിന്കീഴിലെ ഗോഡൗണില് നിന്നും വിതരണം ചെയ്ത മീതൈല് ആല്ക്കഹോള് ചേര്ത്ത സ്പിരിറ്റ് കഴിച്ച് കല്ലുവാതുക്കല്, കൊട്ടാരക്കര പള്ളിക്കല്, പെരുംകുളം, പട്ടാഴി, തിരുവനന്തപുരം ജില്ലയിലെ പള്ളിപ്പുറം എന്നിവിടങ്ങളിലായി 36 പേര് മരിച്ചു എന്നാണ് കേസ്.