ആലുവ കൂട്ടക്കൊല: പോസ്റ് മോര്‍ട്ടം റിപ്പോര്‍ട്ട് കിട്ടി

കൊച്ചി: ആലുവയില്‍ ഒരു കുടുംബത്തിലെ ആറുപേരെ കൊലപ്പെടുത്തിയ കേസ് അന്വേഷിക്കുന്ന സംഘത്തിന് മരിച്ചവരുടെ പോസ്റ് മോര്‍ട്ടം റിപ്പോര്‍ട്ട് കിട്ടി. ജനവരി 24 ബുധനാഴ്ചയാണ് റിപ്പോര്‍ട്ട് പൊലീസിന് ലഭിച്ചത്.

റിപ്പോര്‍ട്ട് പൊലീസ് പരിശോധിച്ചുവരികയാണ്. ഇതിന്റെ അടിസ്ഥാനത്തില്‍ അന്വേഷണം ഊര്‍ജിതമാക്കാനും പൊലീസ് തീരുമാനിച്ചിട്ടുണ്ട്. കൂട്ടക്കൊലയില്‍ വാടക കൊലയാളികള്‍ക്ക് പങ്കുണ്ടെന്ന നിഗമനത്തില്‍ തന്നെയാണ് ഇപ്പോഴും പൊലീസ്. കൊല ചെയ്ത രീതിയാണ് പൊലീസിനെ ഈയൊരു നിഗമനത്തില്‍ എത്താന്‍ സഹായിച്ചത്.

കൂട്ടക്കൊലയ്ക്ക് വാടകകൊലയാളികളെ ഏര്‍പ്പെടുത്തിയത് ദമാമിലേക്ക് കടന്ന വ്യക്തി തന്നെയാണെന്നതിന് പൊലീസിന് തെളിവുകള്‍ ലഭിച്ചിട്ടുണ്ടെന്ന് കരുതുന്നു. കൊല്ലപ്പെട്ട അഗസ്റിന്റെ ബന്ധുവാണ് ദമാമിലേക്ക് കടന്നിരിക്കുന്നത്. ഇയാളെ വിട്ടുകിട്ടുന്നതിന് ഇന്റര്‍പോളിന്റെ സഹായം തേടാനും പൊലീസ് ശ്രമിക്കുന്നുണ്ട്.

കുടുംബാംഗങ്ങള്‍ തമ്മിലുള്ള ശത്രുത തന്നെയാണ് അഗസ്റിന്റെയും കുടുംബത്തിന്റെയും കൊലപാതകത്തില്‍ അവസാനിച്ചതെന്ന് പൊലീസ് കരുതുന്നു. കുടുംബാംഗങ്ങളില്‍ ആര്‍ക്കൊക്കെ അഗസ്റിനോട് ശത്രുതയുണ്ടായിരുന്നുവെന്ന് വിവരങ്ങള്‍ പൊലീസ് ശേഖരിച്ചുവരുന്നു.