മിനറല്‍ വാട്ടറിന്റെ ഗുണനിലവാരം ഉറപ്പാക്കണം

കൊച്ചി: സംസ്ഥാനത്ത് വ്യാപകമായി വിതരണം ചെയ്യുന്ന മിനറല്‍ വാട്ടറിന്റെ ഗുണനിലവാരം ഉറപ്പാക്കാന്‍ വ്യവസ്ഥയുണ്ടാക്കണമെന്നും അത് കര്‍ശനമായി നടപ്പാക്കണമെന്നും നിയമസഭാ പരിസ്ഥിതി കമ്മിറ്റി നിര്‍ദ്ദേശിച്ചു.

സംസ്ഥാനത്തിന്റെ വിവിധ ഭാഗങ്ങളില്‍ പ്രവര്‍ത്തിക്കുന്ന യൂണിറ്റുകളില്‍ പലതും കുപ്പിയിലാക്കി വിതരണം ചെയ്യുന്ന മിനറല്‍ വാട്ടര്‍ ഗുണനിലവാരമില്ലാത്തതും രോഗാണുക്കള്‍ അടങ്ങിയതുമാണെന്ന് പരിസ്ഥിതി കമ്മിറ്റി ചെയര്‍മാന്‍ ആനത്തലവട്ടം ആനന്ദന്‍ പറഞ്ഞു.

മിനറല്‍ വാട്ടര്‍ ഫാക്ടറികളില്‍ പരിശോധന നടത്തുന്നതിന്റെ ഭാഗമായി കൊച്ചിയിലെത്തിയ ആനത്തലവട്ടം ആനന്ദന്‍ വാര്‍ത്താലേഖകരുമായി സംസാരിക്കുകയായിരുന്നു.നിയമസഭാ പരിസ്ഥിതി സമിതി പാലക്കാട് ജില്ലയിലെ ഏഴ് യൂണിറ്റുകളില്‍ നിന്ന് എടുത്ത സാമ്പിള്‍ പരിശോധിച്ചപ്പോള്‍ മൂന്ന് കമ്പനികളുടെ ഉല്പന്നത്തിലും കോളിഫോം ബാക്ടീരിയകള്‍ നിര്‍ദിഷ്ട അളവിലും കൂടുതല്‍ ഉള്ളതായി കണ്ടെത്തി.

എറണാകുളം ജില്ലയില്‍ കീഴ്മാട് പഞ്ചായത്തില്‍ പ്രവര്‍ത്തിക്കുന്ന മിനറല്‍ വാട്ടര്‍ യൂണിറ്റില്‍ നിന്നും സാമ്പിള്‍ ശേഖരിച്ചിട്ടുണ്ടെന്ന് സമിതി അംഗമായ എന്‍.അനിരുദ്ധന്‍ പറഞ്ഞു.