എഐവൈഎഫ് പാര്ലമെന്റ് ഉപരോധിക്കും
കൊച്ചി: എഐവൈഎഫ് ദേശവ്യാപകമായി നടത്തുന്ന പ്രക്ഷോഭത്തിന്റെ ഭാഗമായി തുടര്ച്ചയായി മൂന്ന് ദിവസം പാര്ലമെന്റ് ഉപരോധിക്കുമെന്ന് ദേശീയ ജനറല് സെക്രട്ടറി സോണി ബി.തെങ്ങമം വാര്ത്താ സമ്മേളനത്തില് അറിയിച്ചു.
പാര്ലമെന്റിന്റെ ബജറ്റ് സമ്മേളനം നടക്കുന്ന ഫിബ്രവരി 27,28, മാര്ച്ച് ഒന്ന് തീയതികളിലാണ് ഉപരോധം സംഘടിപ്പിക്കുക. ഇതിനു മുന്നോടിയായി വിവിധ സംസ്ഥാനങ്ങളില് കേന്ദ്ര സര്ക്കാര് ഓഫീസുകളും ഉപരോധിക്കും. കൊച്ചിയില് ഫിബ്രവരി ഒന്നിന് നാളികേര വികസന ബോര്ഡ് ആസ്ഥാനത്തിന് മുന്നിലും കോട്ടയത്ത് റബര് ബോര്ഡ് ആസ്ഥാനത്തുമായാണ് ഉപരോധം .
ഉപരോധത്തിന്റെ സന്ദേശം ജനങ്ങളിലെത്തിക്കാനായി നടന്നുവരുന്ന രണ്ട് സംസ്ഥാനതല പ്രക്ഷോഭയാത്രകള് കൊച്ചിയിലും കോട്ടയത്തും ഫിബ്രവരി ഒന്നിന് സമാപിക്കും.
തൊഴില് മൗലികാവകാശമാക്കുക, വാഗ്ദാനം ചെയ്ത ഒരു കോടി വാര്ഷിക തൊഴില്ദാന പദ്ധതി നടപ്പാക്കുക, നിയമനനിരോധനം പിന്വലിക്കുക, പൊതുമേഖലയെ സംരക്ഷിക്കുക, ഇറക്കുമതിനയം തിരുത്തുക തുടങ്ങിയ ആവശ്യങ്ങളുമായി പൊരുതുക, അല്ലെങ്കില് മരിക്കുക എന്ന മുദ്രാവാക്യമുയര്ത്തിയാണ് പ്രക്ഷോഭം സംഘടിപ്പിക്കുന്നതെന്ന് സോണി ബി. തെങ്ങമം പറഞ്ഞു.