പ്രേമചന്ദ്രന്‍ കൊല്ലത്തു നിന്നും മത്സരിച്ചേക്കും

തിരുവനന്തപുരം: രാജ്യസഭാംഗമായ എന്‍.കെ. പ്രേമചന്ദ്രനെ കൊല്ലത്തു നിന്നും ആര്‍എസ്പി നിയമസഭയിലേക്ക് മത്സരിപ്പിച്ചേക്കും. യുവ നേതാവായ പ്രേമചന്ദ്രന്‍ മത്സരിക്കുകയാണെങ്കില്‍ കൊല്ലം സീറ്റ് പിടിച്ചെടുക്കാനാവുമെന്ന വിശ്വാസമാണ് പാര്‍ട്ടിയെ ഈ നീക്കത്തിന് പ്രേരിപ്പിക്കുന്നത്.

മന്ത്രി വി.പി. രാമകൃഷ്ണപിള്ളയെ ഇരവിപുരത്തു നിന്ന് മാറ്റി മത്സരിപ്പിക്കണമെന്ന അഭിപ്രായവും പാര്‍ട്ടിയില്‍ ഉണ്ട്. കഴിഞ്ഞ തിരഞ്ഞെടുപ്പില്‍ മത്സരിച്ച ആറു സീറ്റിലും ഇത്തവണ സ്ഥാനാര്‍ത്ഥികളെ നിര്‍ത്താന്‍ പാര്‍ട്ടി സംസ്ഥാന കമ്മിറ്റി യോഗം തീരുമാനിച്ചിട്ടുണ്ട്.

സ്ഥാനാര്‍ത്ഥികളെ കണ്ടെത്താന്‍ പാര്‍ട്ടി സംസ്ഥാന സെക്രട്ടേറിയേറ്റിനെ ചുമതലപ്പെടുത്തിയിരിക്കുകയാണ്. ഈ മാസം ഒടുവിലോ അടുത്ത മാസം ആദ്യമോ ഇതു സംബന്ധിച്ച തീരുമാനമുണ്ടാകുമെന്ന് കരുതുന്നത്. സെക്രട്ടിേയറ്റിന്റെ പാനലിന് അന്തിമരൂപം നല്‍കാന്‍ മാര്‍ച്ച് 11 ഞായറാഴ്ച സംസ്ഥാന കമ്മിറ്റി യോഗം ചേരും.