യു ഡി എഫ് നേതാക്കള് സോണിയയെ കണ്ടു
തിരുവനന്തപുരം: യു ഡി എഫ് നേതാക്കള് കോണ്ഗ്രസ് പ്രസിഡന്റ് സോണിയ ഗാന്ധിയുമായി തിരഞ്ഞെടുപ്പ് തന്ത്രങ്ങള് ചര്ച്ച ചെയ്തു. കോണ്ഗ്രസിലെ വിവിധ ഗ്രൂപ്പ് നേതാക്കളുമായും യു ഡി എഫിലെ ഘടകകക്ഷി നേതാക്കളുമായി ഫിബ്രവരി 24 വെള്ളിയാഴ്ചയാണ് സോണിയ കൂടിക്കാഴ്ച നടത്തിയത്.
മുന്മുഖ്യമന്ത്രി കെ. കരുണാകരനും പ്രതിപക്ഷനേതാവ് എ കെ ആന്റണിയുമായി സോണിയ പ്രത്യേകം പ്രത്യേകം ചര്ച്ചകള് നടത്തി. യു ഡി എഫ് നേതാക്കളായ കെ എം മാണി , പി കെ കുഞ്ഞാലിക്കുട്ടി, കെ ആര് ഗൗരിയമ്മ, ടി എം ജേക്കബ് എന്നിവരും സോണിയയെ സന്ദര്ശിച്ച് ചര്ച്ചകള് നടത്തി.
എ കെ ആന്റണി നയിക്കുന്ന കേരള മോചന യാത്രയുടെ സമാപന സമ്മേളനത്തില് പങ്കെടുക്കാന് തിരുവനന്തപുരത്തെത്തിയതായിരുന്നു സോണിയ. തിരഞ്ഞെടുപ്പ് അടുത്തു വരുന്ന സാഹചര്യത്തില് യു ഡി എഫിലേയും കോണ്ഗ്രസിലേയും പടല പിണക്കങ്ങള് ചര്ച്ചകളിലൂടെ പരിഹരിക്കുകയെന്നതാണ് സോണിയയുടെ കൂടിക്കാഴ്ചകള്ക്കു പിന്നില്.
ഘടകകക്ഷിനേതാക്കള് പ്രത്യേകം നിര്ദ്ദേശിച്ചതു പ്രകാരമാണ് ഈ കൂടിക്കാഴ്ചകള്. കോണ്ഗ്രസില് ഗ്രൂപ്പ് തര്ക്കങ്ങള് മൂര്ച്ഛിക്കുന്നത് ഘടകകക്ഷിനേതാക്കളില് അസ്വസ്ഥത പരത്തിയിട്ടുണ്ട്.
എ ഐ സി സി ജനറല് സെക്രട്ടറി ഗുലാം നബി ആസാദും ശനിയാഴ്ചത്തെ ചര്ച്ചകളില് പങ്കെടുത്തു. കോണ്ഗ്രസ് എം പി മാര്, എം എല് എ മര്, കെ പി സി സി ഭാരവാഹികള്, ഡി സി സി പ്രസിഡന്റുമാര് എന്നിവരും സോണിയയെ സന്ദര്ശിച്ച് തങ്ങളുടെ അഭിപ്രായങ്ങള് ധരിപ്പിച്ചു.
കോണ്ഗ്രസിലെ പടലപിണക്കങ്ങള് തിരഞ്ഞെടുപ്പില് യു ഡി എഫിന് പ്രതികൂലമായി മാറുമെന്ന് ഘടകകക്ഷി നേതാക്കള് ഭയപ്പെടുന്നു. സോണിയ ഗാന്ധിയുമായുള്ള കൂടിക്കാഴ്ചയില് ഘടകകക്ഷി നേതാക്കള് ഈ ഭയം അവരെ അറിയിച്ചിട്ടുണ്ടെന്നറിയുന്നു.
കോണ്ഗ്രസിലെ സീറ്റ് വിഭജനവും പ്രശ്നമായിരിക്കുകയാണ്. തങ്ങള്ക്ക് 50 സീറ്റുകള് വേണമെന്നാണ് കരുണാകരവിഭാഗത്തിന്റെ നിലപാട്. കോണ്ഗ്രസിനുള്ള ബാക്കി സീറ്റുകള് ആന്റണി ഗ്രൂപ്പും തിരുത്തല്വാദി, വയലാര് രവി ഗ്രൂപ്പുകളും ചേര്ന്ന് പങ്കിടട്ടെയെന്നാണ് ഐ ഗ്രൂപ്പ് പറയുന്നത്. ഐ ഗ്രൂപ്പിന്റെ ഈ നിലപാടിനോട് യു ഡി എഫിലെ ഘടകകക്ഷി നേതാക്കളും നീരസം പ്രകടിപ്പിച്ചിട്ടുണ്ട്.
സീറ്റ് വിഭജന ചര്ച്ചകള്ക്കായി യു ഡി എഫ് ഉന്നതതല യോഗം ഫിബ്രവരി 26 തിങ്കളാഴ്ച ചേരുന്നുണ്ട്. ഫിബ്രവരി 25 ഞായറാഴ്ച പി സി സി എക്സിക്യൂട്ടീവും ചേരുന്നുണ്ട്.