പെപ്സിയും വില കുറച്ചു

മുംബൈ: ബഹുരാഷ്ട്ര ശീതളപാനീയ കമ്പനിയായ പെപ്സി തങ്ങളുടെ ഉല്പന്നങ്ങളുടെ വില കുറച്ചു. 2001-02ലെ കേന്ദ്ര ബജറ്റില്‍ എക്സൈസ് തീരുവയില്‍ കുറവു വരുത്തിയതിനെ തുടര്‍ന്നാണിത്.

പെപ്സി, മിറിന്‍ഡ ഓറഞ്ച്, മിറിന്‍ഡ ലെമണ്‍, 7അപ് എന്നിവയ്ക്കാണ് വില കുറയുന്നതെന്ന് പെപ്സികോ ഇന്ത്യാ ഹോള്‍ഡിംഗ്സ് പ്രൈവറ്റ് ലിമിറ്റഡ് വക്താവ് മാര്‍ച്ച് രണ്ട് വെള്ളിയാഴ്ച അറിയിച്ചു.

250 മില്ലിലിറ്ററിന്റെ പാക്കിന്റെ വില 10 രൂപയില്‍ നിന്നും 9 രൂപ അമ്പത് പൈസയായി കുറച്ചു. രണ്ട് ലിറ്റര്‍ പെപ്സി ബോട്ടിലുകള്‍ക്ക് ഇനി 49 രൂപ കൊടുത്താല്‍ മതി. ഒന്നര ലിറ്ററിന്റേതിന് 42 രൂപയും. ഇരു ബോട്ടിലുകളിലും ഓരോ രൂപയുടെ കുറവാണ് വരുത്തിയിട്ടുള്ളത്. ഒരു ലിറ്റര്‍ പാക്കിന്റെ വില 22ല്‍ നിന്ന് 20 രൂപയായും 200 മില്ലി ലിറ്ററിന്റേത് 7.50ല്‍ നിന്നും ഏഴു രൂപയായും കുറച്ചു.

ശീതളപാനീയ രംഗത്തെ മറ്റൊരു ബഹുരാഷ്ട്ര കുത്തകയായ കൊക്കക്കോള ഇന്ത്യയും വില കുറച്ചിട്ടുണ്ട്.