എന്‍റോണിനെ തടഞ്ഞത് പൊളിറ്റ് ബ്യൂറോ

തിരുവനന്തപുരം: ആഗോള കുത്തക കമ്പനി എന്‍റോണിന് കേരളത്തിലേയ്ക്കുള്ള പ്രവേശനം തടഞ്ഞത് സി പി എം പൊളിറ്റ് ബ്യൂറോ ആണെന്ന് ഇടതുമുന്നണി കണ്‍വീനര്‍ വി എസ് അച്യുതാനന്ദന്‍. കണ്ണൂരില്‍ താപവൈദ്യുത നിലയം സ്ഥാപിക്കാന്‍ അനുമതി തടഞ്ഞത് അച്യുതാനന്ദനാണെന്ന കെ പി പി നമ്പ്യാരുടെ ആരോപണത്തിനു മാര്‍ച്ച് രണ്ട് വെള്ളിയാഴ്ച മറുപടി നല്‍കുകയായിരുന്നു വി എസ്.

എന്‍റോണ്‍ പങ്കാളിത്തത്തോടെ കണ്ണൂര്‍ നിലയത്തിന് അനുമതി നല്‍കിയിരുന്നുവെങ്കില്‍ കേരളീയര്‍ ഇപ്പോള്‍ നല്‍കുന്നതിന്റെ നാലു മുതല്‍ അഞ്ചു വരെ ഇരട്ടി വൈദ്യുത ചാര്‍ജ് നല്‍കേണ്ടി വരുമായിരുന്നുവെന്ന് വിഎസ് പറഞ്ഞു. മഹാരാഷ്ട്രയില്‍ വൈദ്യുതപദ്ധതി സ്ഥാപിച്ച എന്‍റോണ്‍ ആ സംസ്ഥാനത്തിന് പ്രതിവര്‍ഷം 1800 കോടി രൂപയുടെ നഷ്ടമുണ്ടാക്കുന്നുണ്ടെന്നും അച്യുതാനന്ദന്‍ ചൂണ്ടിക്കാട്ടി. ഇനി കണ്ണൂര്‍ നിലയത്തിന് താന്‍ തടസം നിന്നുവെന്ന നമ്പ്യാരുടെ കുപ്രചാരണം ശരിയാണെങ്കില്‍ തന്നെ താന്‍ കേരളത്തെ രക്ഷിക്കുകയെന്ന നല്ല കാര്യമാണ് ചെയ്തത്.

തന്നെ വിജിലന്‍സ് കേസില്‍ നിന്നും രക്ഷിക്കണമെന്നാവശ്യപ്പെട്ട് അച്യുതാനന്ദനെ സമീപിച്ചില്ലെന്ന കെ പി പി നമ്പ്യാരുടെ വാദം തെറ്റാണെന്നും നമ്പ്യാര്‍ തന്നെ വന്നു കണ്ടത് ഈ ആവശ്യത്തിനു വേണ്ടിയായിരുന്നുവെന്നും വി എസ് ആവര്‍ത്തിച്ചു.