പാതിരാമണല്‍ ഒബ്റോയിക്ക് നല്‍കിയിട്ടില്ല

തിരുവനന്തപുരം: പാതിരാമണല്‍ ദ്വീപ് ഒബ്റോയി ഗ്രൂപ്പിന് പാട്ടത്തിന് നല്‍കിയിട്ടില്ലെന്ന് വിനോദസഞ്ചാര വകുപ്പ് മന്ത്രി ഇ. ചന്ദ്രശേഖരന്‍ നായര്‍.

ഇത്തരത്തില്‍ വന്ന വാര്‍ത്തകള്‍ അടിസ്ഥാനരഹിതമാണെന്ന് മാര്‍ച്ച് അഞ്ച് തിങ്കളാഴ്ച മന്ത്രി വ്യക്തമാക്കി. ടിആര്‍കെ ഗ്രൂപ്പിന് 25 ശതമാനവും ഒബ്റോയിക്ക് 25 ശതമാനവും പൊതുജനങ്ങള്‍ക്ക് 50 ശതമാനവും ഓഹരി പങ്കാളിത്തവുമുള്ള സംരംഭമാണ് പാതിരാമണലില്‍ നടപ്പാക്കുന്നത്.

ഈ പദ്ധതിയുടെ വ്യവസ്ഥകള്‍ കഴിഞ്ഞ വര്‍ഷം മാര്‍ച്ച് 29ന് തീരുമാനിച്ചെന്നും മന്ത്രി അറിയിച്ചു. സ്ഥലം എംഎല്‍എയെ കൂടി അറിയിക്കാതെ യാതൊരു തീരുമാനവും എടുക്കില്ലെന്നും ചന്ദ്രശേഖരന്‍ നായര്‍ പറഞ്ഞു.

കുമരകം, വര്‍ക്കല, എറണാകുളം എന്നിവിടങ്ങളില്‍ ടാജ് ഗ്രൂപ്പിന് ഭൂമി കൈമാറിയത് ഇടതുമുന്നണി സര്‍ക്കാരല്ല. കെടിഡിസിയും ടാജ് ഗ്രൂപ്പും സംയുക്ത സംരംഭം തുടങ്ങാന്‍ തീരുമാനിച്ചത് 1991 മെയ് അഞ്ചിനാണെന്നും മന്ത്രി വെളിപ്പെടുത്തി.