ഐടി രംഗത്ത് ഇന്ത്യ പുറകിലെന്ന്
ജോര്ജിയ: വിവരസാങ്കേതിക രംഗത്ത് ഇന്ത്യ പുറകില് തന്നെയാണെന്ന് കേന്ദ്ര സര്ക്കാരിന്റെ മുന് ശാസ്ത്ര ഉപദേഷ്ടാവ് വി. എസ്. അരുണാചലം.
ഏകദേശം നാല് ലക്ഷം കോടി ഡോളറിന്റെ സോഫ്ട്വെയര് വ്യാപാരമാണ് ലോകത്ത് നടക്കുന്നത്. എന്നിട്ടും വെറും 40 കോടി ഡോളറിന്റെ സോഫ്ട്വെയര് കയറ്റുമതി ചെയ്യുന്ന നമ്മള് ഒന്നാം സ്ഥാനത്തെന്ന് വീമ്പടിക്കുന്നു- ജോര്ജിയ സര്വകലാശാലയില് നടന്ന ഒരു സിമ്പോസിയത്തില് സംസാരിക്കവെ അരുണാചലം പറഞ്ഞു.
അടിസ്ഥാന സൗകര്യങ്ങള് വികസിപ്പിക്കാതെ ഇക്കാര്യത്തില് ഇന്ത്യക്ക് ഒന്നാമതെത്താനാവില്ലെന്ന് അരുണാചലം ചൂണ്ടിക്കാട്ടി. ദില്ലിയിലും മുംബൈയിലും ഉടനെ തന്നെ ഇന്റര്നെറ്റ് ബാന്ഡ്വിഡ്ത്ത് 622 മെഗാബിറ്റ്സ് ആയേക്കാം. എന്നാല് ന്യയോര്ക്കിലും ജര്മ്മനിയിലും ബാന്ഡ്വിഡ്ത്ത് ഇപ്പോള് തന്നെ 40 ഗെഗാബിറ്റ്സാണെന്ന് അരുണാചലം പറഞ്ഞു.
ലോകത്ത് ബാന്ഡ്വിഡ്ത്ത് ഓരോ ആറ് മാസവും കൂടുകയാണ്. ഇതിനൊപ്പം ഇന്ത്യയില് സോഫ്ട്വെയര് വികസനമുണ്ടാകുന്നില്ലെന്ന് അദ്ദേഹം പറഞ്ഞു. ഇതേ വേഗതയില് സോഫ്ട്വെയര് വികസനമുണ്ടായാല് ഇസ്രയേലിനെയും അയര്ലണ്ടിനെയും പോലെ വിവരസാങ്കേതിക വിദ്യ വിപ്ലവം ഇന്ത്യക്കും കൈവരിക്കാനാകുമെന്ന് അരുണാചലം വ്യക്തമാക്കി.
വാര്ത്താവിനിമയ രംഗത്തും വൈദ്യുതി രംഗത്തും അടിസ്ഥാനസൗകര്യങ്ങള് മെച്ചപ്പെട്ടതായാല് മാത്രമേ ഇത്തരത്തില് വളരെ വേഗത്തിലുള്ള വികസനം സാധ്യമാകൂ എന്ന് അരുണാചലം പറഞ്ഞു.