ഗുണമേന്മയില്ലാത്ത മിനറല്‍ വാട്ടര്‍ നിരോധിക്കും

തിരുവനന്തപുരം: ഗുണമേന്മയില്ലാത്ത മിനറല്‍ വാട്ടര്‍ വില്‍ക്കുന്നതിന് നിരോധനം ഏര്‍പ്പെടുത്തുമെന്ന് ഭക്ഷ്യമന്ത്രി ഇ.ചന്ദ്രശേഖരന്‍ നായര്‍ നിയമസഭയില്‍ അറിയിച്ചു.

കഴിഞ്ഞ അഞ്ചുവര്‍ഷക്കാലയളവില്‍ ശുദ്ധമല്ലാത്ത മിനറല്‍ വാട്ടര്‍ വില്പനക്കുവെച്ചതു സംബന്ധിച്ച് 630 കേസുകള്‍ രജിസ്റര്‍ ചെയ്തിട്ടുണ്ടെന്ന് അദ്ദേഹം വെളിപ്പെടുത്തി. മാര്‍ച്ച് എട്ട് വ്യാഴാഴ്ച നിയമസഭയില്‍ ഒരു ചോദ്യത്തിന് മറുപടി പറയുകയായിരുന്നു മന്ത്രി.

സംസ്ഥാനത്ത് ലഭ്യമായ മിക്കവാറും എല്ലാ ബ്രാന്റ് മിനറല്‍ വാട്ടറുകളിലും കോളിഫോം ബാക്ടീരിയ പോലുള്ള ഹാനികരമായ ഘടകങ്ങള്‍ അടങ്ങിയതായി നേരത്തെ നിയമസഭാ പരിസ്ഥിതി കമ്മിറ്റി കണ്ടെത്തിയിരുന്നു. കോളിഫോം ബാക്ടീരിയ മിനര്‍ വാട്ടറില്‍ അല്പം പോലും ഉണ്ടാവാന്‍ പാടില്ലയെന്നിരിക്കെ ഇവയെ മിനറല്‍ വാട്ടര്‍ എന്ന് പറയാന്‍ പറ്റില്ലെന്നും നിയമസഭാ സമിതി ചൂണ്ടിക്കാട്ടിയിരുന്നു.

മിനറല്‍ വാട്ടറിന്റെ ഗുണമേന്മ ഉറപ്പുവരുത്താന്‍ ചില നിര്‍ദേശങ്ങളും സമിതി മുന്നോട്ടുവെച്ചു. സംസ്ഥാന മലിനീകണ നിയന്ത്രണ ബോര്‍ഡിന്റെയും ആരോഗ്യവകുപ്പിന്റെയും അംഗീകാരം ലഭിച്ച മിനറല്‍ വാട്ടര്‍ ബ്രാന്റുകള്‍ക്ക് ലൈസന്‍സ് അനുവദിക്കുന്നതും ലൈസന്‍സ് പുതുക്കുന്നതും തദ്ദേശസ്വയംഭരണ സ്ഥാപനങ്ങള്‍ വഴിയാക്കുക എന്നതായിരുന്നു അതിലൊരു നിര്‍ദേശം.