ആറ്റുകാല് പൊങ്കാല തുടങ്ങി
തിരുവനന്തപുരം: ഭക്തിനിര്ഭരമായ അന്തരീക്ഷത്തില് പ്രസിദ്ധമായ ആറ്റുകാല് പൊങ്കാല ആരംഭിച്ചു.
മാര്ച്ച് ഒമ്പത് വെള്ളിയാഴ്ച രാവിലെ 10. 10ന് ശ്രീകോവിലിലെ വിളക്കില് നിന്നും പണ്ടാര അടുപ്പിലേക്ക് തീ പകര്ന്നതോടെയാണ് പൊങ്കാലക്ക് തുടക്കമായത്. ഭക്തിയുടെ നിര്വൃതിയില് ലക്ഷക്കണക്കിലന് സ്ത്രീകള് ആറ്റുകാലമ്മയ്ക്ക് ശരണം വിളിച്ചു. അടുപ്പുകളില് നിന്നും പുക ഉയര്ന്നപ്പോള് കോവിലനെ വധിച്ച പാണ്ഡ്യരാജാവിന്റെ മധുരാപുരി ചുട്ടെരിക്കുന്ന പാട്ട് തോറ്റംപാട്ടുകാര് പാടുകയായിരുന്നു.
നിമിഷനേരത്തിനുള്ളില് തന്നെ ആറ്റുകാലും പരിസരവും യാഗശാലയായി മാറിക്കഴിഞ്ഞു. മൂന്ന് കിലോമീറ്ററോളം ചുറ്റളവില് പൊങ്കാലയടുപ്പുകള് നിരന്നുകഴിഞ്ഞു. ശക്തമായ സുരക്ഷാ സന്നാഹങ്ങളാണ് പൊങ്കാലയോടനുബന്ധിച്ച് ഏര്പ്പാടാക്കിയിട്ടുള്ളത്. വിദഗ്ധ ഡോക്ടര്മാരുടെ നേതൃത്വത്തില് മെഡിക്കല് സംഘവും സജീവമാണ്. ഭക്തകള്ക്ക് ദാഹജലവും മറ്റുമായി സന്നദ്ധസംഘടനാ പ്രവര്ത്തകരും രംഗത്തുണ്ട്.
സ്ത്രീകള്ക്ക് മാത്രമായി നിരവധി ബസുകള് പുലര്ച്ചെ മുതല് തന്നെ ആറ്റുകാലിലേക്ക് സര്വീസ് തുടങ്ങിയിട്ടുണ്ട്. വ്യാഴാഴ്ച രാവിലെ മുതല് തന്നെ ഭക്തര് ആറ്റുകാലിലേക്ക് പ്രവഹിക്കുകയാണ്. വൈകുന്നേരം 4.10ന് പൊങ്കാല നിവേദ്യം നടക്കും.