റെയില്‍വെ സ്റേഷനുകള്‍ തരം താഴ്ത്തുന്നു

കാസര്‍കോഡ്: തൃക്കരിപ്പൂര്‍, ഏഴിമല, പാപ്പിനിശ്ശേരി, ജഗന്നാഥ ടെമ്പ്ള്‍ ഗെയ്റ്റ്, പയ്യോളി, വള്ളിക്കുന്ന് എന്നീ റെയില്‍വെ സ്റേഷനുകളെ തരം താഴ്ത്തുന്നു.

ഫ്ലാഗ്-ബ്ലോക്ക് സ്റേഷനുകളായ ഇവയെ ഹാള്‍ട്ട് സ്റേഷനുകളായി തരം താഴ്ത്തുമ്പോള്‍ ഇവിടെ നിന്നും ടിക്കറ്റുകള്‍ റിസര്‍വ് ചെയ്യാനാകാതെ വരും. സീസണ്‍ ടിക്കറ്റ് സൗകര്യവും ഇല്ലാതാകും. തരം താഴ്ത്തി കഴിഞ്ഞാല്‍ ഈ സ്റേഷനുകളില്‍ ടിക്കറ്റ് നല്‍കുക കമ്മീഷന്‍ ഏജന്റുമാരായിരിക്കും. ഇവര്‍ വണ്ടി വരുന്ന സമയത്ത് മാത്രമേ ഉണ്ടാവുകയുള്ളു.

പാലക്കാട് ഡിവിഷന്‍ റെയില്‍വെ യൂസേഴ്സ് കണ്‍സല്‍ട്ടേറ്റീവ് കമ്മിറ്റിയോഗം എടുത്ത തീരുമാനപ്രകാരമാണ് തരം താഴ്ത്തലെന്നാണ് റെയില്‍വെ അധികൃതരുടെ ഭാഷ്യം. എന്നാല്‍ കമ്മിറ്റിയംഗവും കാഞ്ഞങ്ങാട് ബ്ലോക്ക് പഞ്ചായത്ത് പ്രസിഡന്റുമായ ഇസ്മയില്‍ ഇത് നിഷേധിക്കുന്നു.

ജനവരി 23ന് ചേര്‍ന്ന യോഗത്തില്‍ ഏഴിമല സ്റേഷന്‍ തരം താഴ്ത്തുന്നതിനുള്ള നിര്‍ദേശം കമ്മിറ്റി അദ്ധ്യക്ഷന്‍ ഉന്നയിച്ചിരുന്നെങ്കിലും കമ്മിറ്റി അത് തള്ളിക്കളഞ്ഞുവെന്ന് ഇസ്മയില്‍ വ്യക്തമാക്കി.