മനേകയ്ക്കെതിരെ ആനപ്രേമികള്
തിരുവനന്തപുരം: സംസ്ഥാനത്തെ ആന ഉടമകളില് നിന്നും ആനകളെ സര്ക്കാര് ഏറ്റെടുക്കണമെന്ന കേന്ദ്ര മന്ത്രി മനേകാ ഗാന്ധിയുടെ ഉത്തരവിനെതിരെ ആനപ്രേമികളുടെ ശക്തമായ പ്രതിഷേധമുയരുന്നു.
ആന ഉടമസ്ഥരില് നിന്നും ആനകളെ സംസ്ഥാന സര്ക്കാര് ഏറ്റെടുക്കണമെന്ന് പറയുന്നത് ഒരിക്കലും പ്രായോഗികമല്ലെന്നാണ് ആന ക്ഷേമ സമിതിയുടെ സെക്രട്ടറി കെ. സി. പണിക്കര് പറയുന്നത്. 100 ആനകളെ വളര്ത്തിയിരുന്ന സംസ്ഥാന സര്ക്കാരിന്റെ പക്കല് ഇപ്പോള് 20 ആനകള് മാത്രമേ ഉള്ളുവെന്ന് പണിക്കര് ചൂണ്ടിക്കാട്ടുന്നു.
മനേകയുടെ ഉത്തരവ് നടപ്പാക്കാനാവില്ലെന്ന് സംസ്ഥാന വനം മന്ത്രി സി. കെ. നാണു വ്യക്തമാക്കിയിട്ടുണ്ട്. എന്നാല് ആനകള്ക്ക് വേണ്ടി ജില്ലകള് തോറുംഅനാഥാലയങ്ങള് തുറക്കാന് സര്ക്കാര് സന്നദ്ധമാണെന്ന് മന്ത്രി അറിയിച്ചു.
ആനകളോടുള്ള പാപ്പാന്മാരുടെ ക്രൂരമായ പെരുമാറ്റമാണ് പ്രധാന പ്രശ്നമെന്ന് പണിക്കര് പറഞ്ഞു. പണ്ട് തൊഴില് നന്നായി പഠിച്ചിരുന്നവരാണ് പാപ്പാന് പണിക്ക് വന്നിരുന്നത്. ആനകളോട് അവര്ക്ക് സ്നേഹവുമുണ്ടായിരുന്നു. ഇന്ന് വേറെ തൊഴിലില്ലാത്തതിനാലാണ് പലരും പാപ്പാന് പണിക്ക് വരുന്നത് - പണിക്കര് പറഞ്ഞു.
ആനകളുടെ നേര്ക്കുള്ള ക്രൂരത അവസാനിപ്പിക്കുവാന് തക്കതായ നിയമനിര്മ്മാണം നടത്താന് സംസ്ഥാന സര്ക്കാരിനോട് നിര്ദേശിക്കണമെന്നാവശ്യപ്പെട്ട് എറണാകുളത്തെ ഇന്സ്റിറ്റ്യൂട്ട് ഓഫ് സോഷ്യല് വെല്ഫെയര് ഹൈക്കോടതിയില് ഹര്ജി നല്കിയിരുന്നു. പാപ്പാന്മാരുടെ അനാസ്ഥമൂലം മരണമടയുന്ന ആനകളുടെ ഉടമകള്ക്ക് നഷ്ടപരിഹാരം നല്കരുതെന്ന് ഇന്ഷുറന്സ് കമ്പനികളോട് ഇന്സ്റിറ്റ്യൂട്ട് ആവശ്യപ്പെട്ടിട്ടുണ്ട്.
ആന ഉടമസ്ഥര് ഒരിക്കലും ആനകളെ സര്ക്കാരിന് കൈമാറില്ലെന്ന് കൊല്ലത്തുള്ള ആനയുടമ ഉണ്ണിക്കൃഷ്ണന് പറഞ്ഞു. ഇത് നിയമമാവുകയാണെങ്കില് ശക്തമായി എതിര്ക്കുക തന്നെ ചെയ്യുമെന്ന് ഉണ്ണിക്കൃഷ്ണന് പറഞ്ഞു.