മദ്യനിരോധനം: മതനേതാക്കള് ഉപവസിക്കുന്നു
കൊച്ചി: സംസ്ഥാനത്ത് ഘട്ടംഘട്ടമായി മദ്യനിരോധനം നടപ്പിലാക്കണമെന്നാവശ്യപ്പെട്ട് മതനേതാക്കളും സാംസ്കാരിക നായകരും ഉപവസിക്കും.
ക്രൈസ്തവ സഭകളുടെ ആഭിമുഖ്യത്തിലുള്ള മദ്യ വിരുദ്ധ ജനകീയ മുന്നണിയാണ് ഉപവാസം സംഘടിപ്പിക്കുന്നത്. മാര്ച്ച് 31 ശനിയാഴ്ച കൊച്ചി ടൗണ് ഹാളില് ഉപവാസം നടക്കുമെന്ന് മുന്നണി കണ്വീനര് ഫാദര് തോമസ് തൈത്തോട്ടം മാര്ച്ച് 19 തിങ്കളാഴ്ച അറിയിച്ചു. മതനേതാക്കളും സാംസ്കാരിക നായകരുമടക്കം ഏകദേശം 5,000 പേര് ഉപവാസത്തില് പങ്കെടുക്കും. ഇടതുമുന്നണി സര്ക്കാരിന്റെ പുതിയ മദ്യനയം വിദേശ മദ്യം കൂടുതല് വിറ്റഴിയുന്നതിനെ സഹായിക്കുമെന്ന് തൈത്തോട്ടം ചൂണ്ടിക്കാട്ടി.
കാലാകാലങ്ങളായി അധികാരത്തില് വരുന്ന സര്ക്കാരുകള് മദ്യപാനത്തെ പ്രോത്സാഹിപ്പിക്കുകയാണെന്നും തൈത്തോട്ടം കുറ്റപ്പെടുത്തി. മദ്യവ്യവസയാത്തില് ഏര്പ്പെടുന്നതില് നിന്നും വിശ്വാസികളെ പിന്തിരിപ്പിക്കാന് വിവിധ സഭകള് ശ്രമിച്ചുവരികയാണെന്ന് തൈത്തോട്ടം വ്യക്തമാക്കി.