കോണ്‍ഗ്രസ് ജനാധിപത്യ മര്യാദ ലംഘിക്കുന്നു

ദില്ലി: സര്‍ക്കാരിനെതിരെയുള്ള തെളിയിക്കപ്പെടാത്ത ആരോപണങ്ങളുടെ പേരില്‍ കോണ്‍ഗ്രസ് ജനാധിപത്യ മര്യാദ ലംഘിക്കുകയാണ് ചെയ്യുന്നതെന്ന് ബിജെപിയുടെ പുതിയ ദേശീയപ്രസിഡന്റ് ജന കൃഷ്ണമൂര്‍ത്തി പറഞ്ഞു.

ബിജെപിയോടുള്ള അന്ധമായ വിരോധവും ജനാധിപത്യ സമ്പ്രദായങ്ങളെ ബഹുമാനിക്കാത്ത ഉത്തരവാദത്തമില്ലാത്ത നേതൃത്വവുമാണ് കോണ്‍ഗ്രസിനുള്ളത്. തെഹല്‍കാ റിപ്പോര്‍ട്ടിലെ ഒറ്റ ആരോപണവും തെളിയിക്കപ്പെടാത്തതാണെങ്കിലും അതിന്റെ പേരില്‍ ഒരാഴ്ചയായി പാര്‍ലമെന്റ് നടപടികള്‍ കോണ്‍ഗ്രസ് തടസപ്പെടുത്തുശയാണ്----അദ്ദേഹം പറഞ്ഞു. രണ്ടുദിവസം നീണ്ടുനില്‍ക്കുന്ന ബിജെപി ദേശീയ എക്സിക്യൂട്ടീവ് യോഗം മാര്‍ച്ച് 24 ശനിയാഴ്ച ഉദ്ഘാടനം ചെയ്യുകയായിരുന്നു അദ്ദേഹം.

പാര്‍ലമെന്റില്‍ പ്രശ്നത്തെ കുറിച്ച് ഒരു സംവാദത്തിന് സര്‍ക്കാര്‍ തയ്യാറാണെങ്കിലും കോണ്‍ഗ്രസ് അതിനൊരുക്കമല്ല. യാതൊരു ചര്‍ച്ചയും കൂടാതെ സര്‍ക്കാര്‍ രാജി വെക്കണമെന്നാണ് അവര്‍ ആവശ്യപ്പെടുന്നത്. ജനാധിപത്യസമ്പ്രദായത്തില്‍ അത്തരമൊരു ആവശ്യത്തിന് എന്ത് സ്ഥാനമാണുള്ളത്.

കോണ്‍ഗ്രസ് ഭരിക്കുമ്പോള്‍ ഉണ്ടായ അഴിമതി ആരോപണത്തെ കുറിച്ച് അന്നത്തെ പ്രതിപക്ഷം ചര്‍ച്ചയ്ക്കും അന്വേഷണത്തിനും ആവശ്യപ്പെട്ടിരുന്നു. അന്ന് കോണ്‍ഗ്രസ് സര്‍ക്കാര്‍ അതിന് തയ്യാറായില്ല. ഇപ്പോഴാകട്ടെ ഭരണപക്ഷം ചര്‍ച്ചയ്ക്കും സംവാദത്തിനും തയ്യാറാണെങ്കിലും കോണ്‍ഗ്രസ് അതിന് ഒരുക്കമല്ല.

എന്‍ഡിഎയിലെ എല്ലാ കക്ഷികളും വാജ്പേയിയുടെ നേതൃത്വത്തിന് കീഴില്‍ ഒറ്റക്കെട്ടായി നില്‍ക്കുമെന്ന് കൃഷ്ണമൂര്‍ത്തി പറഞ്ഞു.