ശ്രീലങ്കന്‍ പൗരത്വമില്ലാത്തവര്‍ക്ക് കുടുംബവിസയ്ക്ക് ഫീ

കൊളംബോ: ശ്രീലങ്കന്‍ പൗരത്വമുള്ള ഇന്ത്യക്കാരുടെ ശ്രീലങ്കന്‍ പൗരത്വമില്ലാത്ത ഭാര്യമാര്‍ ഇനി വാര്‍ഷിക വിസയ്ക്കായി 20,000 രൂപ ലെവിയായി നല്കേണ്ടി വരും. ശ്രീലങ്കന്‍ സര്‍ക്കാരിന്റെ ഈ പുതിയ ബജറ്റ് നിര്‍ദേശം നിരവധി ഇന്ത്യന്‍ കുടുംബങ്ങളെ ആശങ്കയിലാക്കിയിരിക്കുകയാണ്.

1947 ന് മുമ്പ് ശ്രീലങ്കയില്‍ പോയി താവളമുറപ്പിച്ചവരാണ് പിന്നീട് ശ്രീലങ്കന്‍ പൗരത്വം നേടിയ ഇന്ത്യക്കാരില്‍ ഭൂരിപക്ഷവും. ഇക്കൂട്ടത്തില്‍ തമിഴ്നാട്, ആന്ധ്ര, കര്‍ണാടക, മഹാരാഷ്ട്ര, ഗുജറാത്ത് എന്നീ സംസ്ഥാനങ്ങളില്‍ നിന്നുള്ള നിരവധി ഇന്ത്യക്കാര്‍ ഇക്കൂട്ടത്തിലുണ്ട്. എന്നാല്‍ ഇവരുടെ ഭാര്യമാരാരും ശ്രീലങ്കന്‍ പൗരത്വമെടുത്തിട്ടില്ല.

പകരം അവര്‍ ഇന്ത്യന്‍ പൗരത്വം നിലനിര്‍ത്തുകയും വര്‍ഷാവര്‍ഷങ്ങളില്‍ ശ്രീലങ്കയില്‍ കുടുംബവിസ പുതുക്കുകയുമായിരുന്നു പതിവ്. ഇതിന് നേരത്തെ ഫീസ് ഈടാക്കിയിരുന്നില്ല. പുതിയ ബജറ്റിലാണ് ശ്രീലങ്കന്‍ പൗരത്വമില്ലാത്ത ഇന്ത്യക്കാരുടെ ഭാര്യമാര്‍ വാര്‍ഷിക കുടുംബ വിസ എടുക്കാന്‍ 20,000 രൂപ ലെവി നല്കണമെന്ന് നിര്‍ദേശിച്ചിരിക്കുന്നത്.

താരതമ്യേന കുറഞ്ഞ വരുമാനമുള്ളവര്‍ക്ക് ഇത്രയും തുക ലെവിയായി കൊടുക്കാന്‍ ബുദ്ധിമുട്ടുണ്ടാകുമെന്ന് ചൂണ്ടിക്കാണിക്കപ്പെടുന്നു. ലെവി ഏര്‍പ്പെടുത്തുന്നത് ഒഴിവാക്കണമെന്ന ആവശ്യം ഇതിനകം ഉയര്‍ന്നിട്ടുണ്ട്.