ജേക്കബ് ഗ്രൂപ്പ് ഭീഷണി മുഴക്കുന്നു

തിരുവനന്തപുരം: ഇടുക്കി സീറ്റ് ലഭിച്ചില്ലെങ്കില്‍ തിരഞ്ഞെടുപ്പില്‍ നിന്ന് വിട്ടു നില്‍ക്കുമെന്ന് കേരളാ കോണ്‍ഗ്രസ് ജേക്കബ് ഗ്രൂപ്പ്.

ഒന്നുകില്‍ ഇടുക്കി സീറ്റ് അല്ലെങ്കില്‍ അതിന് പകരം വിജയ സാധ്യതയുള്ള മറ്റൊന്ന് എന്ന നിലപാടില്‍ ജേക്കബ് ഉറച്ചു നില്‍ക്കുകയാണ്. ഇത് കോണ്‍ഗ്രസ് അംഗീകരിക്കാത്തതിനെ തുടര്‍ന്ന് മാര്‍ച്ച് 27 വൈകുന്നേരം നടന്ന യുഡിഎഫ് സീറ്റ് വിഭജന ചര്‍ച്ചയില്‍ നിന്നും ജേക്കബ് ഗ്രൂപ്പ് ഇറങ്ങിപ്പോയി.

കടുത്തുരുത്തി മാണി ഗ്രൂപ്പിന് നല്‍കിയതിനാല്‍ ഇടുക്കി തങ്ങള്‍ക്ക് വേണമെന്നായിരുന്നു ജേക്കബ് ഗ്രൂപ്പിന്റെ നിലപാട്. മാണിക്ക് ഇടുക്കി നല്‍കിപ്പോയതിനാല്‍ അത് തരാനാവില്ലെന്ന് കോണ്‍ഗ്രസ് നേതാക്കള്‍ അറിയിച്ചപ്പോള്‍ ഏറ്റുമാനൂര്‍ തരണമെന്ന് ജേക്കബ് ഗ്രൂപ്പ് ആവശ്യപ്പെട്ടു. എന്നാല്‍ തങ്ങളുടെ സിറ്റിംഗ് സീറ്റായ ഏറ്റുമാനൂര്‍ വിട്ടുകൊടുക്കാന്‍ മാണി ഗ്രൂപ്പ് തയാറായില്ല.

എന്നാല്‍ പിറവവും മൂവാറ്റുപുഴയും കൂടി മറ്റ് കക്ഷികള്‍ക്ക് വീതം വച്ചുകൊള്ളാനും തങ്ങള്‍ തിരഞ്ഞെടുപ്പിനില്ലെന്നും പ്രഖ്യാപിച്ച ശേഷം ജേക്കബും ജോണി നെല്ലൂരും യോഗത്തില്‍ നിന്നും ഇറങ്ങിപ്പോയി. കോട്ടയം ജില്ലയില്‍ ഒരു സീറ്റ് തന്നില്ലെങ്കില്‍ തിരഞ്ഞെടുപ്പില്‍ നിന്നും വിട്ടു നില്‍ക്കുമെന്നുള്ള നിലപാടില്‍ ജേക്കബ് ഗ്രൂപ്പ് ഉറച്ചുനില്‍ക്കുകയാണ്.