ഡ്രൈവറെ വഴിയില്‍ തള്ളി കാര്‍ തട്ടിയെടുത്തു

ആലപ്പുഴ: കാര്‍ ഡ്രൈവറെ മര്‍ദ്ദിച്ച് ഉറക്കഗുളിക നല്‍കി മയക്കിയ ശേഷം റോഡില്‍ തള്ളിയ ആറംഗസംഘം കാര്‍ തട്ടിയെടുത്ത് കടന്നു. പുന്നപ്രയില്‍ മാര്‍ച്ച് 30 വെള്ളിയാഴ്ച പുലര്‍ച്ചെയായിരുന്നു സംഭവം.

കാര്‍ ഡ്രൈവര്‍ കൊട്ടാരക്കര പത്തനാപുരം കിഴക്കേച്ചിറ ഇലഞ്ഞിവേലില്‍ രാഘവന്‍പിള്ളയുടെ മകന്‍ രാജേന്ദ്രന്‍പിള്ള(46)യെ വെള്ളിയാഴ്ച പുലര്‍ച്ചേ പുന്നപ്ര വാട്ടര്‍വര്‍ക്സിനു സമീപം ദേശീയപാതയില്‍ മൃതപ്രായമായ നിലയില്‍ കാണപ്പെടുകയായിരുന്നു. രാജേന്ദ്രന്‍പിള്ള ഓടിച്ചിരുന്ന പത്തനാപുരം പുലിയകത്ത് ബിജോയിയുടെ ഉടമസ്ഥതയിലുള്ള അംബാസിഡര്‍ കാറാണ് അജ്ഞാതരായ ആറംഗ സംഘം തട്ടിക്കൊണ്ടു പോയത്.

കൊട്ടാരക്കര പുലമണ്‍ ജംഗ്ഷനില്‍ മാര്‍ച്ച് 29 വ്യാഴാഴ്ച രാത്രി ഒമ്പതിന് സംഘമെത്തി രാജേന്ദ്രന്‍പിള്ളയെ ഓട്ടത്തിനു വിളിക്കുകയായിരുന്നു. പത്തനാപുരത്തിനു സമീപമുള്ള ഒരു സ്ഥലത്തു പോകണമെന്നായിരുന്നു ഒരു സ്ത്രീ അടക്കമുള്ള സംഘത്തിന്റെ ആവശ്യം. യാത്ര തുടങ്ങി ഏതാനും കിലോമീറ്റര്‍ പിന്നിട്ടപ്പോഴേയ്ക്കും പിന്‍സീറ്റില്‍ നിന്നും ഒരാള്‍ രാജേന്ദ്രന്‍പിള്ളയെ തോര്‍ത്ത് കൊണ്ട് ബന്ധിക്കാന്‍ ശ്രമിച്ചു. മുന്‍സീറ്റിലിരുന്നയാള്‍ അപ്പോഴേയ്ക്കും കാറിന്റെ നിയന്ത്രണം ഏറ്റെടുത്തു. തുടര്‍ന്ന് പ്ലാസ്റ്റര്‍ ഒട്ടിച്ച് വായും കൈകാലുകളും ബന്ധിച്ചു. ചലിക്കാന്‍ കഴിയാത്ത നിലയില്‍ രാജേന്ദ്രന്‍ പിള്ളയെ മുന്‍സീറ്റിനടിയിലാക്കി. ഇതിനിടയില്‍ മര്‍ദ്ദനവും ഉണ്ടായി.മയക്കുമരുന്നും കഴിപ്പിച്ചു. തുടര്‍ന്ന് കാറില്‍ നിന്നും തള്ളിയിടുകയായിരുന്നു.

വെള്ളിയാഴ്ച പുലര്‍ച്ചെ അഞ്ചുമണിയോടെ പുന്നപ്ര വാട്ടര്‍വര്‍ക്സിനു സമീപമുള്ള വര്‍ക്ക് ഷോപ്പിലെ ജീവനക്കാര്‍ ഞരക്കം കേട്ട് നോക്കിയപ്പോളാണ് മൃതപ്രായനായ രാജേന്ദ്രന്‍പിള്ളയെ വഴിയില്‍ കണ്ടെത്തിയത്. സംസാരിക്കാനോ ചലിക്കാനോ കഴിയാതെ ശരീരമാകെ പ്ലാസ്റ്ററൊട്ടിച്ച് അവശനിലയിലായ രാജേന്ദ്രന്‍പിള്ളയെ പുന്നപ്ര പൊലീസിന്റെ സഹായത്തോടെ ആലപ്പുഴ മെഡിക്കല്‍ കോളേജാശുപത്രിയില്‍ പ്രവേശിപ്പിച്ചിരിക്കുകയാണ് .