തിരുവനന്തപുരത്ത് ആസാദിന്റെ കോലംകത്തിച്ചു
തിരുവനന്തപുരം: കേരളത്തിലെ കോണ്ഗ്രസ് നിരീക്ഷകന് ഗുലാം നബി ആസാദിന്റെ കോലം ഐ ഗ്രൂപ്പ് കോണ്ഗ്രസ് പ്രവര്ത്തകര് കത്തിച്ചു. ഏപ്രില് എട്ട് ഞായറാഴ്ച തിരുവനന്തപുരത്ത് സെക്രട്ടേറിയറ്റിനു മുന്നിലാണ് സംഭവം.
ശാസ്തമംഗലം മോഹന്, തമ്പാനൂര് സുരേഷ് എന്നിവരുടെ നേതൃത്വത്തില് പാളയം രക്തസാക്ഷി മണ്ഡപത്തില് നിന്നും പ്രകടനമായാണ് പ്രവര്ത്തകര് എത്തിയത്. പ്രകടനത്തില് കരുണാകരന് അനുകൂലമായുള്ള മുദ്രാവാക്യങ്ങള് ഉയര്ന്നു കേട്ടു. കോണ്ഗ്രസ് പ്രസിഡണ്ട് സോണിയാഗാന്ധി, പ്രതിപക്ഷ നേതാവ് എ.കെ. ആന്റണിക്കും ഉമ്മന് ചാണ്ടിക്കും എതിരെയും പ്രവര്ത്തകര് മുദ്രാവാക്യം മുഴക്കി.
കേരളത്തിലെ നിയമസഭാ തിരഞ്ഞെടുപ്പില് എഐസിസി നിയോഗിച്ചിട്ടുള്ള നിരീക്ഷകനാണ് ആസാദ്. സീറ്റ് നിര്ണയത്തില് ഐ ഗ്രൂപ്പിന് അര്ഹമായ പ്രാതിനിധ്യം ലഭിക്കാതിരിക്കുന്നതിനും കെ. കരുണാകരന്റെ മകള് പത്മജക്ക് സീറ്റ് ലഭിക്കാതിരിക്കുന്നതിനും എ.കെ. ആന്റണിയോട് ചേര്ന്ന് ആസാദ് പ്രവര്ത്തിച്ചുവെന്ന് ഐ ഗ്രൂപ്പ് ആരോപിക്കുന്നു.
കോണ്ഗ്രസ് ഹൈക്കമാന്ഡിന്റെ നടപടിയില് പ്രതിഷേധിച്ച് കെ. കരുണാകരന് പ്രവര്ത്തക സമിതിയിലെ പ്രത്യേക ക്ഷണിതാവെന്ന പദം നേരത്തെ രാജിവച്ചിരുന്നു.