പെസഹാ വ്യാഴം ആചരിച്ചു
തിരുവനന്തപുരം: യേശുക്രിസ്തുവിന്റെ അന്ത്യഅത്താഴ വിരുന്നിന്റെ ഓര്മ്മയ്ക്കായി ലോകമെമ്പാടും ക്രൈസ്തവ വിശ്വാസികള് പെസഹാ വ്യാഴം കൊണ്ടാടി. ലോകരക്ഷയ്ക്കായി യേശുദേവന് കാല്വരിയിലെ കുരിശില് തന്റെ ജീവന് വെടിയുന്നതിന്റെ തലേദിവസം ശിഷ്യന്മാരുമായി അവസാനത്തെ അത്താഴം കഴിച്ചതിന്റെ ഓര്മ്മയാണ് പെസഹാ.
2000 വര്ഷങ്ങള്ക്കു മുമ്പ് പെസഹാ ദിനത്തില് യേശു തന്റെ ശരീരവും രക്തവും അപ്പവും വീഞ്ഞുമായി ശിഷ്യന്മാര്ക്ക് വീതിച്ചു നല്കി. അവരുടെ കാല് കഴുകി ചുംബിച്ചു. അനേകര്ക്ക് വേണ്ടി ചിന്തപ്പെടുന്നതും പുതിയ ഉടമ്പടിയുടേതുമായ തന്റെ രക്തം ലോകത്തിനായി യേശു വീതിച്ചു നല്കുകയായിരുന്നു.
പെസഹാവ്യാഴത്തിന്റെ ഓര്മ്മയ്ക്കായി ലോകമെമ്പാടും ക്രിസ്തീയ ദേവാലയങ്ങളില് പെസഹാ ശുശ്രൂഷകള് നടത്തി. കേരളത്തിലെ ദേവാലയങ്ങളില് പെസഹാ അനുസ്മരണ ചടങ്ങുകളും കാല് കഴുകല് ശുശ്രൂഷയും വിശുദ്ധ കുര്ബാന അനുഭവവും നടന്നു.
തന്റെ ശിഷ്യനായ യൂദാസ് , യേശുവിനെ ഒറ്റിക്കൊടുത്തതും പെസഹായുടെ ഈ ദിവസമാണ്. പെസഹായ്ക്കു ശേഷം യേശു ഗത്സമേന തോട്ടത്തില് പ്രാര്ത്ഥിക്കാന് പോയി. അവിടെ വച്ച് യൂദാസ് യേശുവിനെ ശത്രുക്കള്ക്ക് ചൂണ്ടിക്കാണിക്കുകയായിരുന്നു.
അനുതാപത്തിന്റെയും എളിമയുടെയും ദിനമായ പെസഹായ്ക്കു ശേഷം നാളെ ദു:ഖവെള്ളിയാഴ്ചയാണ്. ക്രിസ്തീയ വിശ്വാസപ്രകാരം സകലജനത്തിന്റേയും പാപങ്ങള് പരിഹരിക്കപ്പെടാന് യേശുദേവന് കുരിശില് ത്യാഗം അനുഭവിച്ച ദിവസം. ദു:ഖവെള്ളിയാഴ്ച ആചരിക്കാന് വേണ്ടി ക്രൈസ്തവ വിശ്വാസികള് അനുതാപത്തോടെയും പ്രാര്ത്ഥനയോടെയും ഒരുങ്ങുന്നു.