യൂസേഴ്സ് ഫീ എടുത്തുകളയാന്‍ ആവശ്യപ്പെടും

കോഴിക്കോട്: കോഴിക്കോട് വിമാനത്താവളത്തിലെ റണ്‍വേ നിര്‍മാണം പൂര്‍ത്തിയായ പശ്ചാത്തലത്തില്‍ യൂസേഴ്സ് ഫീ എടുത്തുകളയാന്‍ കേന്ദ്രവ്യോമയാന വകുപ്പിനോട് എയര്‍പോര്‍ട്ട് അതോറിറ്റി ആവശ്യപ്പെടും.

എയര്‍പോര്‍ട്ട് അതോറിറ്റി ഒഫ് ഇന്ത്യ ദക്ഷിണ ജനറല്‍ മാനേജര്‍ ജി.വി.സുബ്രഹ്മണ്യമാണ് ഇക്കാര്യം അറിയിച്ചത്. റണ്‍വേയുടെ പണി പൂര്‍ത്തിയായ നിലക്ക് യൂസേഴ്സ് ഫീ എടുത്തുകളയുന്നതിനോട് എയര്‍പോര്‍ട്ട് അതോറിറ്റിക്ക് വിയോജിപ്പില്ലെന്ന് അദ്ദേഹം വ്യക്തമാക്കി.

റണ്‍വേ നിര്‍മാണം പൂര്‍ത്തിയായതോടെ അന്താരാഷ്ട്രവിമാനത്താവളമായി അംഗീകരിക്കാവുന്ന സാഹചര്യമൊരുങ്ങിയിട്ടുണ്ട്. നെറ്റ്് ലാന്റിംഗ് സംവിധാനവും ഒരുങ്ങിയിട്ടുണ്ട്. എല്ലാ ഘടകങ്ങളും പരിശോധിച്ച് കേന്ദ്രസര്‍ക്കാരാണ് ഇതുസംബന്ധിച്ച പ്രഖ്യാപനം നടത്തേണ്ടത്.

കരിപ്പൂരില്‍ യാത്രക്കാരുടെ എണ്ണത്തില്‍ ആറു ശതമാനം വര്‍ധനയുണ്ട്. ദക്ഷിണമേഖലയിലെ 18 വിമാനത്താവളങ്ങളില്‍ ലാഭകരമായി പ്രവര്‍ത്തിക്കുന്ന മൂന്നെണ്ണത്തില്‍ ഒന്ന് കരിപ്പൂര്‍ വിമാനത്താവളമാണെന്ന് അദ്ദേഹം ചൂണ്ടിക്കാട്ടി.