ചെറിയാന്‍ നീക്കങ്ങള്‍ ആരംഭിച്ചു

കോട്ടയം: പുതുപ്പള്ളിയില്‍ ഉമ്മന്‍ചാണ്ടിക്കെതിരെ മത്സരിക്കുന്ന ചെറിയാന്‍ ഫിലിപ്പ് തിരഞ്ഞെടുപ്പ് വിജയമുറപ്പിക്കാനായി നീക്കങ്ങള്‍ ആരംഭിച്ചു. വിഷുദിനമായ ഏപ്രില്‍ 14ന് അദ്ദേഹം എന്‍എസ്എസ് ജനറല്‍ സെക്രട്ടറി പി.കെ.നാരായണപ്പണിക്കരുമായി കൂടിക്കാഴ്ച നടത്തി.

വിഷുദിനത്തില്‍ തന്നെ പ്രശസ്ത സാഹിത്യകാരന്‍ പൊന്‍കുന്നം വര്‍ക്കിയെയും അദ്ദേഹം സന്ദര്‍ശിച്ചിരുന്നു.

അതേ സമയം ഉമ്മന്‍ചാണ്ടിക്കെതിരെ മത്സരിക്കാനുള്ള ചെറിയാന്‍ ഫിലിപ്പിന്റെ തീരുമാനത്തിനെതിരെ യുഡിഎഫ് നേതാക്കളില്‍ നിന്നും ശ(ഡ)ിയായ വിമര്‍ശനമുയര്‍ന്നു.

തന്റ രാഷ്ട്രീയഗുരുക്കളായ എ.കെ.ആന്റണിയെയും ഉമ്മന്‍ചാണ്ടിയെയും ചെറിയാന്‍ ഒറ്റുകൊടുത്തിരിക്കുകയാണെന്ന് കോണ്‍ഗ്രസ് നേതാവ് കെ.സി.ജോസഫ് പറഞ്ഞു. കേവലം ഒരു അസംബ്ലി സീറ്റിനു വേണ്ടി തന്റെ ആദര്‍ശങ്ങള്‍ അദ്ദേഹം അടിയറവ് വെച്ചിരിക്കുകയാണ്. വെറുമൊരു പ്രസ്താവനാ രാഷ്ട്രീയക്കാരനായ ചെറിയാനെ പുതുപ്പള്ളിയിലെ ജനങ്ങള്‍ തള്ളിക്കളയുമെന്നും ജോസഫ് പറഞ്ഞു.

പുതുപ്പള്ളിയില്‍ ചെറിയാനെ പിന്തുണക്കാന്‍ തീരുമാനിച്ചതിലൂടെ സിപിഎം തങ്ങളുടെ രാഷ്ട്രീയപാപ്പരത്തമാണ് വ്യക്തമാക്കിയിരിക്കുന്നതെന്ന് പിഡിപി കോട്ടയം ജില്ലാ സെക്രട്ടറി എം.എസ്.നൗഷാദ് പറഞ്ഞു.