തെഹല്‍ക്ക എഡിറ്റര്‍ക്ക് സുരക്ഷാസംവിധാനം

ദില്ലി: തെഹല്‍ക്ക.കോം എഡിറ്റര്‍ തരുണ്‍ തേജ്പാലിനെ ഇസെഡ് വിഭാഗത്തില്‍പ്പെടുത്തി സര്‍ക്കാര്‍ സുരക്ഷാസംവിധാനം ഒരുക്കും. സര്‍ക്കാര്‍ ഏറ്റവും ഉയര്‍ന്ന സുരക്ഷാസംവിധാനമാണ് ഇസെഡ് വിഭാഗത്തിലുള്ളവര്‍ക്ക് നല്കുക. അടുത്തിടെ തെഹല്‍ക്ക.കോം വെബ്സൈറ്റിലൂടെ വെളിപ്പെടുത്തിയ പ്രതിരോധക്കോഴ ഇടപാടിനെത്തുടര്‍ന്ന് തേജ്പാലിന്റെ ജീവന് ആപത്തുണ്ടെന്ന ഇന്റലിജന്‍സ് റിപ്പോര്‍ട്ടുകളെത്തുടര്‍ന്നാണ് ആഭ്യന്തര മന്ത്രാലയം ഈ തീരുമാനമെടുത്തത്.

പ്രധാനമന്ത്രി, പ്രതിപക്ഷ നേതാവ് തുടങ്ങിയ പ്രമുഖ വ്യക്തികള്‍ക്ക് സുരക്ഷാ സംവിധാനം ഒരുക്കുന്നത് ഇസെഡ് വിഭാഗത്തില്‍ ഉള്‍പ്പെടുത്തിയാണ്.

ചില രാഷ്ട്രവിരുദ്ധ ശക്തികള്‍ രാഷ്ട്രീയനേട്ടത്തിനു വേണ്ടി തേജ്പാലിനെ കൊലപ്പെടുത്തിയേക്കും എന്നാണ് ഇന്റലിജന്‍സ് ആഭ്യന്തര മന്ത്രാലയത്തിനു നല്‍കിയ റിപ്പോര്‍ട്ട്. മെയ് 10ന് അഞ്ച് സംസ്ഥാനങ്ങളില്‍ തിരഞ്ഞെടുപ്പു നടക്കുന്നതിന്റെ പശ്ചാത്തലത്തിലാണ് സര്‍ക്കാര്‍ ധൃതിപ്പെട്ട് തേജ്പാലിന് സുരക്ഷാസംവിധാനം ഒരുക്കിയിട്ടുള്ളത്.

എന്നാല്‍ ഈ സര്‍ക്കാര്‍ നടപടി തന്റെ ആവശ്യപ്രകാരമല്ല എന്ന് തരുണ്‍ തേജ്പാല്‍ വ്യക്തമാക്കി. തനിക്കിതുവരെ ഭീഷണികളൊന്നും ഉണ്ടായിട്ടില്ലെന്നും അദ്ദേഹം പറഞ്ഞു. എന്നെ പ്രത്യേക സുരക്ഷാവിഭാഗത്തില്‍ ഉള്‍പ്പെടുത്തിയിട്ടുണ്ടെന്നും സുരക്ഷാപ്രവര്‍ത്തകര്‍ നിലയുറപ്പിച്ചുകഴിഞ്ഞുവെന്നും ആഭ്യന്തരമന്ത്രാലയം അറിയിക്കുക മാത്രമാണ് ചെയ്തത്- തേജ് പാല്‍ പറഞ്ഞു.