അഭയാ കേസ്: ചോദ്യം ചെയ്യുന്നതിന് സ്റേ

കൊച്ചി: അഭയാ കേസില്‍ കോട്ടയം ആര്‍ഡിഒ ആയിരുന്ന എസ്. ജി. കെ. കിഷോറിനെ ചോദ്യം ചെയ്യാന്‍ സര്‍ക്കാര്‍ നല്‍കിയ അനുമതിക്ക് ഹൈക്കോടതി സ്റേ.

സര്‍ക്കാര്‍ തീരുമാനത്തെ ചോദ്യം ചെയ്ത് കിഷോര്‍ നല്‍കിയ ഹര്‍ജി പരിഗണിച്ചാണ് ഏപ്രില്‍ 25 ബുധനാഴ്ച ഹൈക്കോടതി സ്റേ പുറപ്പെടുവിച്ചത്. അഭയയുടെ മരണം നടക്കുമ്പോള്‍ കോട്ടയം ആര്‍ഡിഒ ആയിരുന്ന കിഷോറിനെ ചോദ്യം ചെയ്യാന്‍ സിബിഐക്ക് അനുമതി നല്‍കണമെന്ന് ആവശ്യപ്പെട്ട് അഭയാ കേസ് ആക്ഷന്‍ കൗണ്‍സില്‍ കണ്‍വീനര്‍ ജോമോന്‍ പുത്തന്‍പുരയ്ക്കല്‍ നിവേദനം നല്‍കിയിരുന്നു. ഇത് പരിഗണിച്ചാണ് കിഷോറിനെ ചോദ്യം ചെയ്യാന്‍ സര്‍ക്കാര്‍ അനുമതി നല്‍കിയത്.

മരണസമയത്ത് സിസ്റര്‍ അഭയ ധരിച്ചിരുന്ന വസ്ത്രങ്ങള്‍ നശിപ്പിക്കാന്‍ കിഷോര്‍ അനാവശ്യമായ ധൃതി കാട്ടിയെന്ന് ആരോപിച്ചായിരുന്നു കിഷോറിനെ ചോദ്യം ചെയ്യാന്‍ നിവേദനം നല്‍കിയിരുന്നത്. എന്നാല്‍ തനിയ്ക്കെതിരെയല്ല, തന്റെ കീഴുദ്യോഗസ്ഥന്മാര്‍ക്കെതിരെയാണ് സിബിഐ റിപ്പോര്‍ട്ടില്‍ പരാമര്‍ശിച്ചിരിക്കുന്നതെന്ന് കിഷോര്‍ ഹര്‍ജിയില്‍ ചൂണ്ടിക്കാട്ടിയിരുന്നു.