മദ്യനയം ജനദ്രോഹകരം: സുധീരന്‍

കൊച്ചി: നായനാര്‍ സര്‍ക്കാരിന്റെ മദ്യനയം ജനദ്രോഹകരമായിരുന്നുവെന്ന് കോണ്‍ഗ്രസ് നേതാവ് വി.എം.സുധീരന്‍ പറഞ്ഞു.

യുഡിഎഫ് സര്‍ക്കാര്‍ കൊണ്ടുവന്ന ചാരായ നിരോധനം പിന്‍വലിക്കാതെ തന്നെ വ്യാജമദ്യമൊഴുക്കി ചാരായ നിരോധനം പരാജയമാണെന്ന് വരുത്താനാണ് നായനാര്‍ സര്‍ക്കാര്‍ ശ്രമിച്ചത്. മണിച്ചനെ പോലുള്ള അബ്കാരി രാജാക്കന്മാരെ വളര്‍ത്തിയ ഈ സര്‍ക്കാരിന്റെ കാലത്തു തന്നെയാണ് മദ്യനിരോധന സമിതി പ്രവര്‍ത്തകനായ സതീശന്‍ കൊല്ലപ്പെട്ടത്. ഇടതു സര്‍ക്കാരിന്റെ ഒത്താശയോടെയാണ് അബ്കാരി കോണ്‍ട്രാക്ടര്‍മാര്‍ വ്യാജമദ്യമൊഴുക്കിയതെന്ന് സുധീരന്‍ ആരോപിച്ചു.

എളംകുളം മണ്ഡലത്തിലെ കത്രിക്കടവില്‍ പദയാത്ര ഉദ്ഘാടനം ചെയ്തുസംസാരിക്കുകയായിരുന്നു സുധീരന്‍.

കേരളത്തെ സാമ്പത്തികമായി പാപ്പരാക്കുകയാണ് എല്‍ഡിഎഫ് സര്‍ക്കാര്‍ ചെയ്തത്. കേരളത്തിന്റെ പൊതുകടം 10,000 കോടിയില്‍ നിന്ന് 27,000 കോടിയാക്കിയത് ഈ സര്‍ക്കാരാണ്.-അദ്ദേഹം പറഞ്ഞു.