ലോക്സഭ അനിശ്ചിത കാലത്തേയ്ക്ക് പിരിഞ്ഞു

ദില്ലി: കലുഷമായ ഒരു സമ്മേളനത്തിനു ശേഷം ഏപ്രില്‍ 27 വെള്ളിയാഴ്ച ലോക്സഭ അനിശ്ചിത കാലത്തേയ്ക്ക് പിരിഞ്ഞു. തെഹല്‍കാ ഡോട്ട് കോം പുറത്തു കൊണ്ടുവന്ന വിവാദമായ ആയുധ കോഴ ഇടപാടുകളെച്ചൊല്ലിയുള്ള തര്‍ക്കങ്ങള്‍ സഭയില്‍ പലപ്പോഴും കയ്യാങ്കളിയുടെ വക്കില്‍ വരെയെത്തിയിരുന്നു.

സഭയിലുണ്ടായ ദൗര്‍ഭാഗ്യകരമായ സംഭവങ്ങളില്‍ സ്പീക്കര്‍ ജിഎംസി ബാലയോഗി , പ്രധാനമന്ത്രി എ.ബി. വാജ്പേയി , പ്രതിപക്ഷനേതാവ് സോണിയാ ഗാന്ധി എന്നിവര്‍ വെള്ളിയാഴ്ച ഖേദം പ്രകടിപ്പിച്ചു.

ഇക്കഴിഞ്ഞ ഫിബ്രവരി 18 ന് ആരംഭിച്ച ലോക്സഭാസമ്മേളനം മാര്‍ച്ച് 13 ന് തെഹല്‍കാ ഡോട്ട് കോം വെളിപ്പെടുത്തിയ ആയുധ കോഴയിടപാടുകളെക്കുറിച്ചുളള ചര്‍ച്ചകളാല്‍ പിന്നീടങ്ങോട്ട് പ്രക്ഷുബ്ധമായിരുന്നു. ചെറിയൊരിടവേളയ്ക്ക് ശേഷം സഭ ഏപ്രില്‍ 16 ന് വീണ്ടും സമ്മേളിച്ചപ്പോഴും ബഹളം തുടര്‍ന്നു. ഒടുവില്‍ ബജറ്റ് പാസാക്കാന്‍ സഹകരിക്കണമെന്നാവശ്യപ്പെട്ട് പ്രധാനമന്ത്രി വാജ്പേയി പ്രതിപക്ഷനേതാവ് സോണിയാ ഗാന്ധിക്ക് കത്തു നല്‍കുകയും ഇരുവരും സ്പീക്കറുടെ സാന്നിദ്ധ്യത്തില്‍ ചര്‍ച്ച നടത്തുകയും ചെയ്തതിനു ശേഷമാണ് പൊതു ബജറ്റ് സഭ പാസാക്കിയത്.

തെഹല്‍കാ വെളിപ്പെടുത്തലുകളെക്കുറിച്ച് സംയുക്തപാര്‍ലമെന്ററി സമിതി അന്വേഷണം ആവശ്യപ്പെട്ടായിരുന്നു കോണ്‍ഗ്രസിന്റെ നേതൃത്വത്തിലുള്ള പ്രതിപക്ഷാംഗങ്ങളുടെ ബഹളം. ഒടുവില്‍ ഇക്കാര്യം പരിഗണിക്കാമെന്ന് സര്‍ക്കാരിന് വാക്കു നല്‍കേണ്ടി വന്നു.