തെഹല്‍ക: രേഖകള്‍ ഹാജരാക്കാന്‍ ആവശ്യപ്പെട്ടു

ദില്ലി: ഇസ്രായേലി ബാരക്ക് മിസൈലുകളും റഷ്യന്‍ ടി-90 ടാങ്കുകളും വാങ്ങിയതുമായി ബന്ധപ്പെട്ട രേഖകള്‍ ഹാജരാക്കാന്‍ തെഹല്‍ക്ക റിപ്പോര്‍ട്ടിലെ വെളിപ്പെടുത്തലുകളെ കുറിച്ച് അന്വേഷിക്കുന്ന വെങ്കടസ്വാമി കമ്മിഷന്‍ സര്‍ക്കാരിനോട് ആവശ്യപ്പെട്ടു.

തെഹല്‍ക ടേപ്പില്‍ പരാമര്‍ശിക്കുന്ന എല്ലാ ആയുധ ഇടപാടുകളെയും കുറിച്ചുള്ള രേഖകള്‍ ഹാജരാക്കാന്‍ പ്രതിരോധ മന്ത്രാലയത്തോട് ആവശ്യപ്പെട്ടിട്ടുണ്ടെന്ന് ഏപ്രില്‍ 27 വെള്ളിയാഴ്ച ജസ്റിസ് കെ.വെങ്കടസ്വാമി പറഞ്ഞു.

പ്രതിരോധവകുപ്പിനും ആഭ്യന്തരവകുപ്പിനും വാര്‍ത്താ വിതരണപ്രക്ഷേപണ വകുപ്പിനും ഇന്റലിജന്‍സ് ഏജന്‍സികള്‍ക്കും തെഹല്‍ക.കോമിനും സീ ടിവിക്കും അന്വേഷണവുമായി ബന്ധപ്പെട്ട് സമന്‍സ് അയച്ചിട്ടുണ്ട്.

രേഖകള്‍ ഹാജരാക്കാന്‍ മെയ് നാല് വരെ കക്ഷികള്‍ക്ക് സമയം അനുവദിച്ചിട്ടുണ്ട്. ടേപ്പുകള്‍ മുഴുവന്‍ കണ്ടതിനു ശേഷം വ്യക്തികള്‍ക്കുള്ളനോട്ടീസ് അയക്കും. മെയ് അവസാനത്തിലോ ജൂണ്‍ ആദ്യത്തിലോ കേസിന്മേല്‍ വാദം കേള്‍ക്കല്‍ ആരംഭിക്കുമെന്ന് വെങ്കിടസ്വാമി പറഞ്ഞു.