നീലനും കുഞ്ഞാലിക്കുട്ടിക്കുമെതിരേ സ്ത്രീവേദി പ്രചാരണം നടത്തും
കോഴിക്കോട്: ലൈംഗിക കുറ്റവാളികളെന്ന് ആരോപിക്കപ്പെട്ട മുന് മന്ത്രിമാരായ എ നീലലോഹിതദാസന് നാടാര്ക്കും പി കെ കുഞ്ഞാലിക്കുട്ടിയ്ക്കുമെതിരേ കേരള സ്ത്രീവേദി പ്രചാരണം നടത്തും. എല് ഡി എഫ് സ്ഥാനാര്ത്ഥിയായി കോവളത്ത് മത്സരിക്കുന്ന നീലലോഹിതദാസന് നാടാര്ക്കും യു ഡി എഫ് സ്ഥാനാര്ത്ഥിയായി കുറ്റിപ്പുറത്ത് മത്സരിക്കുന്ന പി കെ കുഞ്ഞാലിക്കുട്ടിയ്ക്കുമെതിരേ തങ്ങള് ശക്തമായ പ്രചാരണം നടത്തുമെന്ന് സ്ത്രീവേദി കണ്വീനര് കെ അജിത അറിയിച്ചു.
കുറ്റിപ്പുറം നിയോജകമണ്ഡലത്തില് ഏപ്രില് 28 ശനിയാഴ്ച സ്ത്രീകളുടെ കണ്വെന്ഷന് സംഘടിപ്പിച്ചു കൊണ്ട് കുഞ്ഞാലിക്കുട്ടിയ്ക്കെതിരായ പ്രചാരണം തുടങ്ങും . തുടര്ന്ന് നടത്തുന്ന പ്രചാരണ പരിപാടികള്ക്ക് സ്ത്രീവേദി രൂപം നല്കിയിട്ടുണ്ട്.
നീലലോഹിതദാസന് നാടാര്ക്കെതിരായി കോവളത്ത് സ്ത്രീവേദി തിരുവനന്തപുരം ഘടകമാണ് പ്രചാരണ പരിപാടികള് നടത്തുന്നത്.
ആരോപണ വിധേയരായ വ്യക്തികള്ക്ക് ടിക്കറ്റ് നല്കരുതെന്ന് എല്ലാ രാഷ്ട്രീയപ്പാര്ട്ടികളോടും മുന്നണികളോടും അഭ്യര്ത്ഥിച്ചിരുന്നതാണെന്നും അത് അവഗണിക്കപ്പെട്ട സാഹചര്യത്തിലാണ് പ്രതികളെന്ന് ആരോപിക്കപ്പെട്ടിട്ടുള്ള രണ്ടു മുന്മന്ത്രിമാര്ക്കുമെതിരേ സ്ത്രീവേദി പ്രചാരണം നടത്തുന്നതെന്നും അജിത വ്യക്തമാക്കി.
രാഷ്ട്രീയ അക്രമങ്ങള്ക്കിടയില് വീട്ടമ്മയ്ക്ക് നേരേ ലൈംഗിക പീഡനം നടന്ന നാദാപുരത്ത് പ്രത്യേക പ്രചാരണം നടത്താന് സ്ത്രീവേദി ഉദ്ദേശിക്കുന്നില്ല. നാദാപുരത്ത് കഴിഞ്ഞ ദിവസം സ്ത്രീവേദിയുടെ നേതൃത്വത്തില് പ്രചാരണ ജാഥ സംഘടിപ്പിച്ചിരുന്നു.
സൂര്യനെല്ലി, വിതുര, കോഴിക്കോട് പെണ്വാണിഭകേസുകളിലെ പ്രതികളെ നിയമത്തിന്റെ പരിധിയില് കൊണ്ടുവരണമെന്നാവശ്യപ്പെട്ട് നാലഞ്ചു വര്ഷമായി കേരള സ്ത്രീവേദി സമരത്തിലാണ്.
കോഴിക്കോട് ഐസ്ക്രീം പെണ്വാണിഭ കേസിലാണ് മുന് മന്ത്രിയും മുസ്ലീംലീഗ് നേതാവുമായ പി കെ കുഞ്ഞാലിക്കുട്ടി പ്രതിയാണെന്ന ആരോപണം.
മന്ത്രിയായിരുന്ന നീലലോഹിതദാസന് നാടാര് തന്നെ ലൈംഗികമായി പീഡിപ്പിക്കാന് ശ്രമിച്ചുവെന്ന മുന് ഗതാഗത സെക്രട്ടറി നളിനി നെറ്റോയുടെ ആരോപണം ജനതാദള് നേതാവ് നീലലോഹിതദാസന് നാടാരെ പ്രതിക്കൂട്ടില് നിര്ത്തിയിരിക്കുന്നു.