തളിപ്പറമ്പില്‍ വീണ്ടും സംഘര്‍ഷം

തളിപ്പറമ്പ് : കൂടുതല്‍ പൊലീസ് ക്യാമ്പ് ചെയ്തതോടെ ശാന്തമായി എന്നു കരുതിയ തളിപ്പറമ്പില്‍ വീണ്ടും സംഘര്‍ഷം.

ഏപ്രില്‍ 27 വെള്ളിയാഴ്ച സിപിഎം പ്രവര്‍ത്തകര്‍ എന്നു സംശയിക്കുന്ന സംഘം കോണ്‍ഗ്രസ് നേതാവിനെ വീട്ടില്‍ കയറി വെട്ടിപ്പരിക്കേല്പിച്ചു. കുറുമാത്തൂര്‍ മണ്ഡലം കോണ്‍ഗ്രസ് കമ്മിറ്റി സെക്രട്ടറിയും പഞ്ചായത്ത് യുഡിഎഫ് തിരഞ്ഞെടുപ്പ് കമ്മിറ്റി വൈസ് ചെയര്‍മാനുമായ കെ. രാജീവന്(27) ആണ് വെട്ടേറ്റത്. അദ്ദേഹത്തെ ഗുരുതരമായ പരിക്കുകളോടെ തളിപ്പറമ്പ് എ.എം. ആശുപത്രിയില്‍ പ്രവേശിപ്പിച്ചു.

വെള്ളിയാഴ്ച അതിരാവിലെയാണ് അക്രമമുണ്ടായത്. ഇരുമ്പു ദണ്ഡുകൊണ്ടുള്ള അടിയേറ്റ് മുട്ടിനു താഴെ തകര്‍ന്നിട്ടുണ്ട്. ഒരു കൈയും അക്രമികള്‍ തല്ലിയൊടിച്ചു. രാജീവന്‍ കിടന്നുറങ്ങുകയായിരുന്ന മുറിയുടെ വാതില്‍ ചവുട്ടിപ്പൊളിച്ചായിരുന്നു അക്രമം. രാജീവന്റെ വീട്ടുകാരുടെ നിലവിളി കേട്ട് എത്തിയ നാട്ടുകാരാണ് രാജീവനെ ആശുപത്രിയില്‍ കൊണ്ടുപോയത്. നാട്ടുകാരെത്തിയതോടെ അക്രമിസംഘം ഓടിപ്പോയി.