കേരളത്തില്‍ ബിജെപി അക്കൗണ്ട് തുറക്കും

തിരുവനന്തപുരം: ഇത്തവണ ഒരു ബിജെപി അംഗമെങ്കിലും കേരള നിയമസഭയിലെത്തുമെന്ന് പാര്‍ട്ടി അഖിലേന്ത്യാ അധ്യക്ഷന്‍ ജനകൃഷ്ണമൂര്‍ത്തി.

ഇത് തങ്ങളുടെ പ്രതീക്ഷ മാത്രമല്ല ജനങ്ങളുടെ ആഗ്രഹം കൂടിയാണെന്ന് അദ്ദേഹം പറഞ്ഞു. ജനങ്ങള്‍ക്ക് പരിവര്‍ത്തനത്തിനുള്ള ആഗ്രഹമുണ്ട്. സംസ്ഥാനത്ത് രണ്ട് ദിവസത്തെ തിരഞ്ഞെടുപ്പ് പ്രചരണത്തിനായി ഏപ്രില്‍ 28 ശനിയാഴ്ച തിരുവനന്തപുരത്തെത്തിയ കൃഷ്ണമൂര്‍ത്തി വാര്‍ത്താലേഖകരോട് സംസാരിക്കുകയായിരുന്നു.

കേരളത്തില്‍ സാമുദായിക സംഘടനകള്‍ സ്വീകരിച്ചിരിക്കുന്ന നിലപാട് ബിജെപിയ്ക്ക് അനുകൂലമാണെന്ന് അദ്ദേഹം പറഞ്ഞു. എസ്എന്‍ഡിപിയുടെയും എന്‍എസ്എസിന്റെയും പ്രഖ്യാപനങ്ങള്‍ അതാണ് തെളിയിക്കുന്നത്.

മാര്‍ക്സിസ്റുകാരെ തങ്ങള്‍ ശത്രുക്കളായി കാണുന്നില്ല. രാഷ്ട്രീയത്തില്‍ ശത്രുക്കളില്ല. പ്രതിയോഗികളേയുള്ളു. കേരളത്തിലെ പ്രശ്നബാധിത പ്രദേശങ്ങളിലെ സംഘര്‍ഷം ഒഴിവാക്കാന്‍ തിരഞ്ഞെടുപ്പ് കമ്മീഷന്‍ സ്വീകരിച്ചിട്ടുള്ള നടപടികളില്‍ തങ്ങള്‍ക്ക് വിശ്വാസമുണ്ടെന്നും കൃഷ്ണമൂര്‍ത്തി വ്യക്തമാക്കി.