ജേക്കബിനെ വീണ്ടും ആക്രമിച്ചു

പിറവം: മുന്‍ മന്ത്രിയും മണ്ഡലത്തിലെ സ്ഥാനാര്‍ത്ഥിയുമായ കേരള കോണ്‍ഗ്രസ് (ജേക്കബ്) നേതാവ് ടി.എം. ജേക്കബിനെതിരെ വീണ്ടും ആക്രമണം. തിരഞ്ഞെടുപ്പു ദിവസമായ മെയ് 10 വ്യാഴാഴ്ച ഇരുമ്പനത്തു വച്ചാണ് ജേക്കബിനെതിരെ ആക്രമണം നടന്നത്. അദ്ദേഹത്തിന് പരിക്കേറ്റതായി റിപ്പോര്‍ട്ടില്ല.

വ്യാഴാഴ്ച വൈകുന്നേരം നാലു മണിയോടടുത്താണ് സംഭവം നടന്നത്. മണ്ഡലത്തിലൂടെ സഞ്ചരിക്കുകയായിരുന്നു ജേക്കബ്. ഇരുമ്പനം സ്കൂളിനു മുന്നിലെത്തിയപ്പോഴാണ് ഇടതുമുന്നണി പ്രവര്‍ത്തകരെന്ന് പറയപ്പെടുന്നവരുടെ ആക്രമണം ഉണ്ടായത്. ആക്രമണത്തില്‍ കാറിന്റെ പിന്‍വശത്തെ ചില്ല് തകര്‍ന്നു.

ജേക്കബിന്റെ മകന്‍ അനൂപ് സഞ്ചരിച്ചിരുന്ന വാഹനത്തിനു നേരെയും ആക്രമണം ഉണ്ടായി. കൈപ്പട്ടൂരില്‍ വച്ചാണ് ജേക്കബിനെ അനുഗമിക്കുയായിരുന്ന അനൂപിന് നേരെ ആക്രമണമുണ്ടായത്. ജേക്കബ് പോളിംഗ് സ്റേഷനിലേക്ക് പോയപ്പോള്‍ ഒരു കൂട്ടം പേര്‍ അനൂപിന്റെ ജീപ്പ് വളയുകയായിരുന്നുവത്രെ. അനൂപും കൂടെയുണ്ടായിരുന്ന കെഎസ്സി പ്രവര്‍ത്തകരും ഓടിരക്ഷപ്പെട്ടു.