ജോര്‍ജിന്റെ ഭാര്യയ്ക്ക് പെട്രോള്‍ പമ്പ് വേണ്ട

ദില്ലി: സര്‍ക്കാര്‍ വിശദീകരണം ചോദിച്ചതിനെ തുടര്‍ന്ന് സോണിയാഗാന്ധിയുടെ പ്രൈവറ്റ് സെക്രട്ടറി വി. ജോര്‍ജിന്റെ ഭാര്യ ലില്ലി ജോര്‍ജ് പെട്രോള്‍ പമ്പ് വേണ്ടെന്ന് പെട്രോളിയം മന്ത്രാലയത്തെ അറിയിച്ചു.

വൈകാരികമായ ചില കാരണങ്ങളുടെ അടിസ്ഥാനത്തിലാണ് ലില്ലിക്ക് പെട്രോള്‍ പമ്പ് അനുവദിച്ചത്. ഈ കാരണങ്ങള്‍ ഇപ്പോഴും നിലനില്‍ക്കുന്നുണ്ടോ എന്ന പെട്രോളിയം മന്ത്രാലയത്തിന്റെ അന്വേഷണത്തെ തുടര്‍ന്ന് 1991ല്‍ തന്നെ താന്‍ പമ്പ് വേണ്ടെന്ന് വച്ചിരുന്നുവെന്ന് ലില്ലി വ്യക്തമാക്കിയിരിക്കുകയാണ്.

ലില്ലി വേണ്ടെന്ന് വച്ച പമ്പ് കാര്‍ഗില്‍ യുദ്ധത്തില്‍ മരിച്ച ജവാന്റെ വിധവയ്ക്ക് നല്‍കുമെന്ന് പെട്രോളിയം മന്ത്രി രാം നായിക് മെയ് 11 വെള്ളിയാഴ്ച അറിയിച്ചു. തന്റെ ഭര്‍ത്താവിന്റെ ജോലി താല്‍ക്കാലികമായിരുന്നുവെന്നും അത് നഷ്ടപ്പെട്ടതിനാല്‍ കുടുംബം നടത്തിക്കൊണ്ടുപോകാന്‍ ബുദ്ധിമുട്ടായിരിക്കുകയാണെന്നും കാണിച്ചാണ് ലില്ലി 1991ല്‍ പമ്പിനായി അപേക്ഷ നല്‍കിയത്.