സൂപ്പര്‍ സ്പെഷ്യാലിറ്റി ആശുപത്രി വിദേശ നിക്ഷേപം തേടുന്നു

തിരുവനന്തപുരം: തിരുവനന്തപുരത്ത് സ്ഥാപിക്കാനുദ്ദേശിക്കുന്ന മള്‍ട്ടി സ്പെഷ്യാലിറ്റി ആശുപത്രി വിദേശ ഇന്ത്യാക്കാരില്‍ നിന്നും മൂലധനനിക്ഷേപം തേടുന്നു. ആശുപത്രിയുടെ പ്രമോട്ടര്‍മാരായോ, ഓഹരിയുടമകളായോ വിദേശ ഇന്ത്യാക്കാര്‍ക്ക് നിക്ഷേപം നടത്താമെന്ന് ബന്ധപ്പെട്ടവര്‍ അറിയിച്ചു.

യു എസ്, യൂറോപ്പ്, ഗള്‍ഫ് മേഖലകളില്‍ നിന്നുമുള്ള 150 ല്‍ പരം വിദേശ ഇന്ത്യാക്കാര്‍ സംരംഭത്തിനു പിന്തുണ പ്രഖ്യാപിച്ചിട്ടുണ്ട്. ഇവരില്‍ 30 പേര്‍ യുഎഇയില്‍ നിന്നുള്ളവരാണ്. കേരള ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസ് (കിംസ്) എന്നാണ ് പുതിയ ആശുപത്രിയുടെ പേര്.

2001 ആഗസ്ത് 17 ന് (ചിങ്ങമാസം ഒന്നാം തീയതി) പ്രവര്‍ത്തനമാരംഭിക്കത്തക്ക വിധത്തിലാണ് ആശുപത്രിയുടെ പ്രവര്‍ത്തനങ്ങള്‍ മുന്നോട്ടു പോകുന്നത്. കേരളത്തില്‍ സഹകരണ മേഖലയിലെ ആദ്യ ടെര്‍ഷിയറി റഫറല്‍ ആശുപത്രിയാണ് കിംസ് എന്ന് ബന്ധപ്പെട്ടവര്‍ അവകാശപ്പെടുന്നു.

75 കോടി രൂപ മുടക്കി പണിയുന്ന സൂപ്പര്‍ സ്പെഷ്യാലിറ്റി ആശുപത്രിയില്‍ 350 കിടക്കകള്‍ ആദ്യഘട്ടത്തില്‍ പൂര്‍ത്തിയാക്കും. 48 ഇന്റന്‍സീവ് കെയര്‍ ബെഡുകളും എട്ട് ഓപ്പറേഷന്‍ തിയേറ്ററുകളും ഉണ്ടാകും. വിദഗ്ധരായ ഡോക്ടര്‍മാരും നഴ്സുമാരും കൈകാര്യം ചെയ്യുന്ന ട്രോമാ കെയര്‍ സെന്റര്‍ ആശുപത്രിയുടെ പ്രത്യേകതയാണ്.