ഗ്രാഫൈറ്റ്: കെ. എം. മാണി നാലാം പ്രതി

തിരുവനന്തപുരം: ഗ്രാഫൈറ്റ് രണ്ടാം ഘട്ട കേസില്‍ മുന്‍ മന്ത്രി കെ. എം. മാണിയെ നാലാം പ്രതിയാക്കാന്‍ വിജിലന്‍സ് കോടതി ഉത്തരവായി.

മാണിയെ പ്രതി ചേര്‍ക്കണമെന്ന വിജിലന്‍സ് സ്പെഷ്യല്‍ പ്രോസിക്യൂട്ടറുടെ ആവശ്യത്തെ തുടര്‍ന്നാണ് മെയ് 15 ചൊവാഴ്ച തിരുവനന്തപുരം വിജിലന്‍സ് സ്പെഷല്‍ കോടതി ജഡ്ജി ജസ്റിസ് കെ. ബാലകൃഷ്ണന്‍ ഉത്തരവ് പുറപ്പെടുവിച്ചത്.

വിജിലന്‍സ് പുനരന്വേഷണ റിപ്പോര്‍ട്ടിലും മാണിയെ പ്രതി ചേര്‍ക്കേണ്ടതില്ലെന്നായിരുന്നു നിര്‍ദേശം. എന്നാല്‍ പബ്ലിക് പ്രോസിക്യൂട്ടര്‍ പി. എ. അഹമ്മദ് മാണിയെ പ്രതി ചേര്‍ക്കണമെന്ന് കോടതിയോട് ആവശ്യപ്പെടുകയായിരുന്നു. ഇതേ ആവശ്യമുന്നയിച്ച് ഒരു സ്വകാര്യ അന്യായവും കോടതിയുടെ പരിഗണനയില്‍ ഉണ്ടായിരുന്നു.

എന്നാല്‍ ഒരാളെ പ്രതി ചേര്‍ക്കാന്‍ പ്രോസിക്യൂട്ടര്‍ക്ക് നിര്‍ദേശിക്കാന്‍ അധികാരമില്ലെന്നാണ് മാണിയുടെ വാദം. ഇത് സംബന്ധിച്ച് സുപ്രീം കോടതിയുടെ ഉത്തരവുണ്ടെന്നും അദ്ദേഹം വാദിക്കുന്നു. എന്നാല്‍ പ്രോസിക്യൂട്ടര്‍ക്ക് അഭിപ്രായം ഉന്നയിക്കാന്‍ സുപ്രീം കോടതി ഉത്തരവുണ്ടെന്നാണ് പ്രോസിക്യൂട്ടറുടെ വാദം.

കര്‍ണാടകത്തിലെ ഗ്രാഫൈറ്റ് കമ്പനിക്ക് വൈദ്യുതി മറിച്ചു വിറ്റതില്‍ ക്രമക്കേടുണ്ടെന്നാണ് കേസ്. സംഭവം നടക്കുമ്പോള്‍ ആര്‍. ബാലകൃഷ്ണപിള്ള അഞ്ചു ദിവസം മാത്രമായിരുന്നു മന്ത്രിസ്ഥാനത്തുണ്ടായിരുന്നത്. ബാക്കിയുള്ള കാലം മാണിയായിരുന്നു മന്ത്രി.