ആന്റണി മന്ത്രിസഭ സത്യപ്രതിജ്ഞ ചെയ്തു

തിരുവനന്തപുരം: എ. കെ. ആന്റണിയുടെ നേതൃത്വത്തിലുള്ള എട്ടംഗ മന്ത്രിസഭ മെയ് 17 വ്യാഴാഴ്ച സത്യപ്രതിജ്ഞ ചെയ്ത് അധികാരമേറ്റു.

രാവിലെ 10. 45നാണ് ചടങ്ങ് ആരംഭിച്ചത്. മുഖ്യമന്ത്രിയായി ആന്റണിയാണ് ആദ്യം സത്യപ്രതിജ്ഞ ചെയ്തത്. ഗവര്‍ണര്‍ സുഖ്ദേവ് സിംഗ് കാങ്് ആന്റണിക്ക് സത്യവാചകം ചൊല്ലിക്കൊടുത്തു. തുടര്‍ന്ന് പി. കെ. കുഞ്ഞാലിക്കുട്ടി, കെ. എം. മാണി, കെ. ആര്‍. ഗൗരിയമ്മ, ടി. എം. ജേക്കബ്, ബാബു ദിവാകരന്‍, കെ. ബി. ഗണേശ്കുമാര്‍, എം. വി. രാഘവന്‍ എന്നിവരും സത്യപ്രതിജ്ഞ ചെയ്തു.

രാജ്ഭവനില്‍ ഒരുക്കിയ കൂറ്റന്‍ പന്തലില്‍ സുസ്മേരവദനനായി തൊഴുകൈയോടെ ആന്റണി പ്രവേശിച്ചപ്പോള്‍ മുദ്രാവാക്യം വിളികളും കരഘോഷവും അന്തരീക്ഷത്തെ ശബ്ദമുഖരിതമാക്കി. അനുയായികളെയും സദസിനെയും നോക്കി കൈവീശി അഭിവാദനങ്ങള്‍ അര്‍പ്പിച്ച ശേഷമാണ് ആന്റണി സത്യവാചകം ചൊല്ലാന്‍ തുടങ്ങിയത്.

കുഞ്ഞാലിക്കുട്ടി അല്ലാഹുവിന്റെ നാമത്തില്‍ സത്യപ്രതിജ്ഞ ചെയ്തു. ആന്റണിയും ബാബു ദിവാകരനും എം. വി. രാഘവനും ഗൗരിയമ്മയും ദൃഢപ്രതിജ്ഞ ചെയ്തപ്പോള്‍ മറ്റ് നേതാക്കള്‍ ദൈവനാമത്തിലാണ് സത്യപ്രതിജ്ഞ എടുത്തത്.

സത്യപ്രതിജ്ഞ ചെയ്യാനെത്തിയ കെ. എം. മാണിക്ക് സത്യവാചകത്തിന്റെ ഇംഗ്ലീഷ് കോപ്പി ഗവര്‍ണര്‍ നല്‍കിയത് ആശയക്കുഴപ്പത്തിനിടയാക്കി. ഞാന്‍ മലയാളത്തില്‍ സത്യപ്രതിജ്ഞ ചെയ്തുകൊള്ളം എന്ന് പറഞ്ഞ് ചിരിച്ച ശേഷം മാണി സത്യപ്രതിജ്ഞ ചെയ്തു.

വലതുകൈയില്‍ പ്ലാസ്ററുമിട്ടാണ് ടി. എം. ജേക്കബ് സത്യപ്രതിജ്ഞയ്ക്കെത്തിയത്. പിറവത്ത് നടന്ന അക്രമത്തില്‍ ജേക്കബിന്റെ കൈയ്ക്ക് പരിക്കേറ്റിരുന്നു.

സത്യപ്രതിജ്ഞ ചെയ്യാനായി ഓരോ നേതാക്കളും എത്തുമ്പോള്‍ അനുയായികള്‍ മുദ്രാവാക്യം വിളിക്കുന്നുണ്ടായിരുന്നു. കൃത്യം 10. 45ന് തുടങ്ങിയ ചടങ്ങ് 11. 15ന് അവസാനിച്ചു.