വനിതാ പഞ്ചായത്തംഗത്തിന് കുത്തേറ്റു
കാസര്കോട്: കാസര്കോട് ഉദുമയില് മെയ് 22 ചൊവാഴ്ച നടന്ന സംഘട്ടനത്തില് സിപിഎം വനിതാ പഞ്ചായത്തംഗത്തിന് കുത്തേറ്റു. ഉദുമ ഗ്രാമപഞ്ചായത്തിലെ സിപിഎം അംഗമായ ലക്ഷ്മിയ്ക്കാണ് കുത്തേറ്റത്.
ചൊവാഴ്ച രാവിലെയാണ് സിപിഎം പ്രവര്ത്തകരുടെ വീടുകള്ക്കുനേരെ ആക്രമണമുണ്ടായത്. ലക്ഷ്മിക്കു പുറമെ മറ്റു നാല് സിപിഎം പ്രവര്ത്തകര്ക്കും ആക്രമണത്തില് പരിക്കേറ്റു. വേണുഗോപാല്(26), കുഞ്ഞിക്കണ്ണന്(38), ഭാര്യ ബേബി(34), അരവിന്ദാക്ഷന്(24) എന്നിവരാണ് പരിക്കേറ്റ മറ്റ് നാല് പേര്.
മുസ്ലിംലീഗ് പ്രവര്ത്തകരാണ് ആക്രമണം നടത്തിയതെന്ന് സിപിഎം ആരോപിക്കുന്നു. ഉദുമ അരമങ്ങാനത്തിനടുത്തുള്ള അമരാവതിയിലാണ് ചൊവാഴ്ച രാവിലെ സംഘട്ടനം നടന്നത്. തിങ്കളാഴ്ച ഉദുമയിലെ നാലാം വാതുക്കല്, ഇഞ്ചിലങ്കാട് പ്രദേശങ്ങളില് സിപിഎമ്മുകാരും മുസ്ലീം ലീഗുകാരും ഏറ്റുമുട്ടിയിരുന്നു.
സിപിഎം അക്രമത്തില് ആറ് ലീഗ് പ്രവര്ത്തകര്ക്ക് പരിക്കേറ്റിരുന്നു. ഇതിന് പകരമായാണ് ചൊവാഴ്ചയിലെ ആക്രമണമെന്ന് കരുതുന്നു. കഴിഞ്ഞ ഏതാനും ദിവസങ്ങളിലായി ഉദുമയില് സിപിഎം- ലീഗ് സംഘട്ടനം നടക്കുകയാണ്.