ഗുജറാത്തില്‍ ചുഴലിക്കാറ്റിന് സാധ്യത

അഹമ്മദാബാദ്: അതിശക്തമായ ചുഴലിക്കാറ്റ് അടുത്ത 24 മണിക്കൂറിനുള്ളില്‍ ഗുജറാത്തില്‍ നാശം വിതയ്ക്കാന്‍ സാധ്യത. പ്രതിരോധ നടപടികള്‍ കൈക്കൊള്ളാന്‍ ഗുജറാത്ത് മുഖ്യമന്ത്രി കേശുഭായി പട്ടേലിന്റെ നേതൃത്വത്തില്‍ അടിയന്തര യോഗം ചേര്‍ന്നിരിക്കുകയാണ്.

സംസ്ഥാനത്താകെ ജാഗ്രത പാലിക്കാന്‍ ജനങ്ങളോട് സര്‍ക്കാര്‍ മുന്നറിയിപ്പ് നല്കി. ഗുജറാത്തിന്റെ തീരപ്രദേശങ്ങളില്‍ താമസിക്കുന്ന ജനങ്ങളെ ഉടനടി മാറ്റിപ്പാര്‍പ്പിക്കാനും സര്‍ക്കാര്‍ ശ്രമം തുടങ്ങി. ഭൂകമ്പമുണ്ടായ കച്ചിലെ കണ്ട്ലയില്‍ താല്ക്കാലിക ഷെഡ്ഡുകളില്‍ താമസിക്കുന്നവരെയും മാറ്റിപ്പാര്‍പ്പിക്കും.

മണിക്കൂറില്‍ 200 കിലോമീറ്ററിലധികം വേഗതയുള്ള കാറ്റിനെ അതിജീവിക്കാന്‍ ഈ താല്ക്കാലിക ഷെഡ്ഡുകള്‍ക്ക് ശേഷിയില്ലെന്ന് സര്‍ക്കാര്‍ വൃത്തങ്ങള്‍ പറഞ്ഞു. ഗുജറാത്തിലെ ജനങ്ങള്‍ തിങ്ങിപ്പാര്‍ക്കുന്ന വികസിത പ്രദേശങ്ങള്‍ക്കു നേരെയാണ് ഇപ്പോള്‍ ചുഴലിക്കാറ്റിന്റെ ദിശ.

മെയ് 24 വ്യാഴാഴ്ച ഉച്ചവരെയുള്ള കണക്കുപ്രകാരം വെരാവല്‍ ജില്ലയ്ക്ക് 380 കിലോമീറ്റര്‍ തെക്ക് ഭാഗത്തായാണ് ചുഴലിക്കാറ്റ് കേന്ദ്രീകരിച്ചിട്ടുള്ളത്. ചുഴലിക്കാറ്റ് അറബിക്കടലിലേക്ക് തന്നെ തിരിച്ചുപോകാനുള്ള സാധ്യത വളരെ വിദൂരമാണെന്നും വിദഗ്ധര്‍ പ്രവചിക്കുന്നു.