ഉഷ കേസില്‍ വിസി സത്യവാങ്്മൂലം നല്കണം

കൊച്ചി: വനിതാ ജീവനക്കാര്‍ക്കു നേരെയുള്ള ലൈംഗികചൂഷണം തടയാന്‍ സമിതി രൂപീകരിക്കുന്നതു സംബന്ധിച്ച് എന്തൊക്കെ നടപടികളെടുത്തുവെന്നതു സംബന്ധിച്ച് സത്യവാങ്മൂലം സമര്‍പ്പിക്കാന്‍ ഹൈക്കോടതി കലിക്കറ്റ് സര്‍വകലാശാല വൈസ് ചാന്‍സലറോട് ആവശ്യപ്പെട്ടു.

ഉഷ കേസിനോടനുബന്ധിച്ചാണ് കലിക്കറ്റ് സര്‍വകലാശാലയില്‍ ഇത്തരമൊരു സമിതി രൂപീകരിക്കണമെന്ന് നിര്‍ദേശമുണ്ടായത്. ചീഫ് ജസ്റിസ് കെ.കെ. ഉഷയും ജസ്റിസ് കുര്യന്‍ ജോസഫും അംഗങ്ങളായുള്ള ഡിവിഷന്‍ ബഞ്ചാണ് ഈ വിധി പ്രസ്താവിച്ചത്.

ഉഷയ്ക്കെതിരെ അപവാദപ്രചാരണം നടത്തിയ പ്രകാശനെതിരെ വനിതാകമ്മീഷന്‍ നല്കിയ നിര്‍ദേശങ്ങളിന്മേല്‍ എന്തൊക്കെ നടപടികള്‍ സ്വീകരിച്ചു എന്നതു സംബന്ധിച്ച് റിപ്പോര്‍ട്ട് നല്കാന്‍ ഗവ. പ്ലീഡറോട് ഹൈക്കോടതി ആവശ്യപ്പെട്ടിട്ടുണ്ട്. പ്രകാശനെ സസ്പെന്റ് ചെയ്യണമെന്നാവശ്യപ്പെട്ട് ഉന്നതവിദ്യാഭ്യാസ സെക്രട്ടറി നല്കിയ ഉത്തരവിന്മേലെടുത്ത നടപടികളെക്കുറിച്ചും ഹൈക്കോടതിയില്‍ റിപ്പോര്‍ട്ട് നല്കാന്‍ ആവശ്യപ്പെട്ടിട്ടുണ്ട്.

മെയ് 29 ചൊവാഴ്ച ഇത് സംബന്ധിച്ച വിവരങ്ങള്‍ നല്കണമെന്നാണ് കോടതി ആവശ്യപ്പെട്ടിട്ടുള്ളത്. ഉഷാകേസില്‍ വനിതാകമ്മീഷന്‍ നിര്‍ദേശങ്ങള്‍ നടപ്പാക്കണമെന്നാവശ്യപ്പെട്ട് സ്ത്രീവേദി പ്രവര്‍ത്തകര്‍ സമര്‍പ്പിച്ച പരാതി പരിഗണിച്ചാണ് ഹൈക്കോടതി ഈ ഉത്തരവ് പുറപ്പെടുവിച്ചത്.