ഗുജറാത്തില്‍ കേരളം പോളിടെക്നിക്ക് നിര്‍മിക്കും

തിരുവനന്തപുരം: കേരളസര്‍ക്കാരിന്റെ ഗുജറാത്ത് ഭൂകമ്പ ദുരിതാശ്വാസനിധിയിലേക്ക് ലഭിച്ച പണമുപയോഗിച്ച് ഗുജറാത്തില്‍ പോളിടെക്നിക്ക് നിര്‍മ്മിക്കുമെന്ന് മുഖ്യമന്ത്രി എ. കെ. ആന്റണി പറഞ്ഞു.

ഗുജറാത്ത് സര്‍ക്കാരിന്റെ അഭ്യര്‍ത്ഥന മാനിച്ചാണ് ഭൂകമ്പത്തില്‍ ത കര്‍ന്ന പോളിടെക്നിക്കിന് പകരം പുതിയത് നിര്‍മ്മിച്ച് നല്‍കുന്നതെന്ന് മെയ് 30 ബുധനാഴ്ച ആന്റണി പറഞ്ഞു. അവിടെ ഗ്രാമം ദത്തെടുത്ത് വീടുകള്‍ നിര്‍മ്മിക്കാനാണ് ആദ്യം തീരുമാനിച്ചിരുന്നത്. പക്ഷെ വീടുകള്‍ വയ്ക്കുന്നതില്‍ ഗുജറാത്ത് സര്‍ക്കാരിന് താല്‍പര്യമുണ്ടായിരുന്നില്ല.

കഴിഞ്ഞ സര്‍ക്കാരിന്റെ കാലത്ത് പത്ത് കോടിയിലേറെയാണ് ദുരിതാശ്വാസനിധിയിലേക്ക് ലഭിച്ചത്. സഹകരണവകുപ്പ് ഒന്നേകാല്‍ കോടിയും നല്‍കിയിട്ടുണ്ട്. ഭൂകമ്പത്തില്‍ മരിച്ച മലയാളികളുടെ ആശ്രിതര്‍ക്ക് 30, 000 രൂപ വീതം നല്‍കുമെന്നും ആന്റണി അറിയിച്ചു.

കടലാക്രമണക്കെടുതികള്‍ നേരിടാന്‍ രണ്ട് കോടി രൂപ സംസ്ഥാന മന്ത്രിസഭായോഗം അനുവദിച്ചു. സാമ്പത്തികപ്രതിസന്ധി കണക്കിലെടുക്കാതെ മത്സ്യത്തൊഴിലാളികളുടെയും മറ്റും ദുരിതം അവസാനിപ്പിക്കുന്നതിന് വേണ്ടിയാണിതെന്ന് ആന്റണി വ്യക്തമാക്കി. കളക്ടര്‍മാര്‍ റിപ്പോര്‍ട്ട് നല്‍കുന്നതിനുസരിച്ച് സൗജന്യറേഷന്‍ ഉല്‍പ്പടെയുള്ള കൂടുതല്‍ ആശ്വാസനടപടികള്‍ സ്വീകരിക്കും.