മണിപ്പൂരില് രാഷ്ട്രപതിഭരണം പ്രഖ്യാപിച്ചു
ദില്ലി: രാഷ്ട്രീയ അനിശ്ചിതാവസ്ഥ നിലനില്ക്കുന്ന മണിപ്പൂരില് രാഷ്ട്രപതിഭരണം പ്രഖ്യാപിച്ചു കൊണ്ട് രാഷ്ട്രപതി ഉത്തരവായി. കേന്ദ്രമന്ത്രിസഭയുടെ ശുപാര്ശ പ്രകാരമാണ് രാഷ്ട്രപതി കെ.ആര്. നാരായണന് ഈ ഉത്തരവില് ഒപ്പിട്ടത്.
ദില്ലിയില് ജൂണ് രണ്ട് ശനിയാഴ്ച ചേര്ന്ന മന്ത്രിസഭായോഗമാണ് മണിപ്പൂരില് രാഷ്ട്രപതി ഭരണം ഏര്പ്പെടുത്താന് ശുപാര്ശ ചെയ്തത്. രണ്ടു ദിവസം മുമ്പ് മണിപ്പൂര് ഗവര്ണര് വേദ് പ്രകാശ് മാര്വ സംസ്ഥാനത്ത് രാഷ്ട്രപതിഭരണം ഏര്പ്പെടുത്തണമെന്നാവശ്യപ്പെട്ട് രാഷ്ട്രപതി കെ.ആര്. നാരായണന് റിപ്പോര്ട്ട് നല്കിയിരുന്നു.
രാധാബിനോദ് കൊയ്ജാം നേതൃത്വം നല്കിയിരുന്ന സമതാപാര്ട്ടി മന്ത്രിസഭ മെയ് 21 തിങ്കളാഴ്ച വിശ്വാസപ്രമേയം പരാജയപ്പെട്ട് പുറത്തായതോടെയാണ് മണിപ്പൂരില് രാഷ്ട്രീയ അനിശ്ചിതാവസ്ഥ തുടങ്ങിയത്. സമതാ സര്ക്കാരിനെ ബിജെപി അംഗങ്ങള് പിന്തുണയ്ക്കുമെന്ന് കരുതിയിരുന്നെങ്കിലും അവസാനം അവര് സര്ക്കാരിനെ പുറത്താക്കുന്നതിനെ അനുകൂലിക്കുകയായിരുന്നു.
പിന്നീട് ബിജെപി മന്ത്രിസഭ ഉണ്ടാക്കാന് തീരുമാനിച്ചെങ്കിലും സമതാപാര്ട്ടി എതിര്ത്തു. സമതയുടെ എതിര്പ്പ് കേന്ദ്രസര്ക്കാരിന് ഭീഷണിയാവുമെന്ന് ഉറപ്പായപ്പോള് കേന്ദ്രനേതൃത്വം ഇടപെട്ട് ബിജെപി നേതാക്കളെ പിന്തിരിപ്പിക്കുകയായിരുന്നു. പിന്നീട് സ്പീക്കര് ധനഞ്ജയ് സിംഹ് മന്ത്രിസഭ ഉണ്ടാക്കാന് അവകാശം ഉന്നയിച്ചെങ്കിലും ഗവര്ണര് ആവശ്യപ്പെട്ട പിന്തുണ നല്കുന്ന എംഎല്എമാരുടെ പട്ടിക ഹാജരാക്കാന് അദ്ദേഹത്തിന് സാധിച്ചില്ല.