കാസര്കോട്ട് സിപിഎം പ്രവര്ത്തകരെ ആക്രമിച്ചു
ചെറുവത്തൂര്: കാസര്കോട് ജില്ലയില് സിപിഎം പ്രവര്ത്തകരുടെ വീടുകള്ക്കും കടകള്ക്കും നേരെ ആക്രമണം നടന്നു. ജൂണ് മൂന്ന് ഞായറാഴ്ച രാത്രിയാണ് ആക്രമണമുണ്ടായത്.
തിങ്കളാഴ്ച രാവിലെ പട്രോളിംഗ് നടത്തുകയായിരുന്ന പൊലീസ് സംഘത്തിനു നേരെയും ആക്രമണമുണ്ടായതായി റിപ്പോര്ട്ടുണ്ട്.
ചെറുവത്തൂര്, പടന്ന എന്നീ മേഖലകളിലാണ് അക്രമം വ്യാപിച്ചിട്ടുള്ളത്. സിപിഎം പ്രവര്ത്തകരുടെ ആറ് കടകള്ക്കും മൂന്ന് വീടുകള്ക്കും നേരെയാണ് ആക്രമണം ഉണ്ടായിട്ടുള്ളത്.
ഞായറാഴ്ച രാത്രിയെത്തിയ ഒരു സംഘം വീട്ടില്കയറി വീട്ടുപകരണങ്ങളും മറ്റും പുറത്തേക്കെറിഞ്ഞു. കൊള്ള നടന്നതായും റിപ്പോര്ട്ടുണ്ട്. ഭയസംഭീതരായ നാട്ടുകാര് വീടു വിട്ടുപോകാന് തുടങ്ങിയിട്ടുണ്ട്.
തദ്ദേശസ്വയംഭരണ വകുപ്പുമന്ത്രി ചെര്ക്കളം അബ്ദുള്ളയുടെ സ്വീകരണം ജൂണ് ഒന്ന് വെള്ളിയാഴ്ച ഒരു സംഘം പേര് അലങ്കോലപ്പെടുത്തിയതില് നിന്നാണ് അക്രമത്തിന്റെ തുടക്കും. ഞായറാഴ്ച മന്ത്രിയും ഉത്തരമേഖലാ ഐജി അല്ഫോണ്സ് ലൂയിസും ചര്ച്ച നടത്തിയിരുന്നെങ്കിലും സമാധാനപ്രവര്ത്തനം തുടങ്ങാന് സാധിച്ചിട്ടില്ല.