ജ്ഞാനേന്ദ്രയ്ക്കെതിരെ വിമര്‍ശനവുമായി പ്രതിപക്ഷം

കാഠ്മണ്ഡു: പുതിയ നേപ്പാള്‍ രാജാവിനെതിരെ നേപ്പാളിലെ പ്രധാന പ്രതിപക്ഷപാര്‍ട്ടിയില്‍ നിന്നും വിമര്‍ശനമുയരുന്നു. അദ്ദേഹം ഒരു ഏകാധിപതിയെപ്പോലെ തീരുമാനമെടുക്കുന്നുവെന്ന വിമര്‍ശനമാണ് ജൂണ്‍ അഞ്ച് ചൊവാഴ്ച നേപ്പാളിലെ കമ്മ്യൂണിസ്റ് പാര്‍ട്ടി-യുനൈറ്റഡ് മാര്‍ക്സിസ്റ്-ലെനിനിസ്റ് (സിപിഎന്‍-യുഎംഎല്‍) നേതാവ് മാധവ് കുമാര്‍ നേപ്പാള്‍ ഉയര്‍ത്തിയിരിക്കുന്നത്.

നേപ്പാളിലെ രാജകുടുംബാംഗങ്ങള്‍ കൊല്ലപ്പെട്ടതു സംബന്ധിച്ച് അന്വേഷണം നടത്താന്‍ നിയോഗിച്ച മൂന്നംഗസമിതിയില്‍ പേരുള്‍പ്പെടുത്തുന്നതിന് മുന്‍പ് തന്നോടാലോചിച്ചില്ലെന്നാണ് മാധവ്കുമാറിന്റെ വിമര്‍ശനം. ഏകപക്ഷീയമായാണ് അന്വേഷണസമിതിയിലെ മൂന്നംഗങ്ങളുടെയും പേരുകള്‍ അദ്ദേഹം പ്രഖ്യാപിച്ചത്. മാത്രമല്ല, ഭരണഘടനാപരമായി ഇത്തരം അന്വേഷണങ്ങള്‍ക്ക് ഉത്തരവിടേണ്ടത് പ്രധാനമന്ത്രിയാണെന്നും അദ്ദേഹം പറഞ്ഞു.

തന്റെ പാര്‍ട്ടിയുടെ ഒരു അടിയന്തരയോഗം നടക്കുകയാണെന്നും അതിനു ശേഷം ഇക്കാര്യത്തിലുള്ള പാര്‍ട്ടിയുടെ ഔദ്യോഗിക തീരുമാനം പ്രഖ്യാപിക്കുമെന്നും മാധവ്കുമാര്‍ പറഞ്ഞു. മൂന്നംഗസമിതിയുടെ അധ്യക്ഷന്‍ ജഡ്ജി ഉപാധ്യായയെ മാധവ് കുമാര്‍ തന്റെ അഭിപ്രായം അറിയിച്ചിട്ടുണ്ടെന്നും അദ്ദേഹത്തിന്റെ പാര്‍ട്ടിയുടെ ഔദ്യോഗിക വക്താവ് വ്യക്തമാക്കി.

മാത്രമല്ല, ഈ സമിതിയില്‍ നേപ്പാള്‍ പ്രധാനമന്ത്രി ഗിരിജാ പ്രസാദ് കൊയ്രാളയുടെ പേര് ഉള്‍പ്പെടുത്തണമെന്നത് നേപ്പാളിന്റെ ആവശ്യമായിരുന്നെന്നും മാധവ് കുമാര്‍ വിമര്‍ശിക്കുന്നു. മാധവ് കുമാറിന്റെ സിപിഎന്‍- യുഎംഎല്‍ എന്ന പാര്‍ട്ടി അന്വേഷണകമ്മീഷനുമായി നിസ്സഹകരിച്ചാല്‍ അത് സര്‍ക്കാര്‍ വിരുദ്ധ കലാപത്തിന് ആക്കം കൂട്ടുമെന്ന് കരുതുന്നു. ഇതിനകം നേപ്പാള്‍ കലാപത്തില്‍ 12 പേര്‍ മരിച്ചിരുന്നു.