കള്ളുപാര്‍ലറുകള്‍ തുടങ്ങാന്‍ ആലോചന

കൊച്ചി: കേരളത്തില്‍ വിനോദസഞ്ചാര കേന്ദ്രങ്ങളോടനുബന്ധിച്ച് സര്‍ക്കാര്‍ നിയന്ത്രിത കള്ളുപാര്‍ലറുകള്‍ തുടങ്ങാന്‍ ആലോചിക്കുന്നതായി ടൂറിസം മന്ത്രി കെ.വി. തോമസ് അറിയിച്ചു. കെടിഡിസിയുടെ ബിയര്‍-വൈന്‍ പാര്‍ലറുകളുടെ മാതൃകയിലായിരിക്കും പ്രധാനമായും വിദേശ വിനോദസഞ്ചാരികളെ ഉദ്ദേശിച്ച് കള്ളുപാര്‍ലറുകള്‍ സ്ഥാപിക്കുക.

നല്ല കള്ള് ലഭ്യമാക്കുന്നത് ലക്ഷ്യം വച്ചുള്ള ഈ പദ്ധതി നന്നായി ആലോചിച്ചു മാത്രമേ നടപ്പാക്കുകയുള്ളൂവെന്നും മന്ത്രി കൂട്ടിച്ചേര്‍ത്തു.വിനോദസഞ്ചാര കേന്ദ്രങ്ങളോടനുബന്ധിച്ച് കൂണുകള്‍ പോലെ മുളച്ചു പൊന്തുന്ന ആയുര്‍വേദ ചികിത്സാ കേന്ദ്രങ്ങളെ നിയന്ത്രിക്കാന്‍ നടപടികള്‍ സ്വീകരിക്കുമെന്ന് മന്ത്രി കെ.വി. തോമസ് അറിയിച്ചു.

തികച്ചും ശാസ്ത്രീയമായ ആയുര്‍വേദ ചികിത്സ ലഭ്യമാക്കുന്ന അംഗീകൃത കേന്ദ്രങ്ങളെ മാത്രമേ പ്രവര്‍ത്തിക്കാന്‍ അനുവദിക്കൂ. ടൂറിസം വികസനം ലക്ഷ്യമാക്കി സംസ്ഥാനത്തെ മൂന്ന് വിമാനത്താവളങ്ങളേയും തമ്മില്‍ ബന്ധിപ്പിച്ചു കൊണ്ടുള്ള സര്‍വീസ് ആരംഭിക്കും. യൂറോപ്യന്‍ രാജ്യങ്ങളിലേയ്ക്കും അമേരിക്കയിലേയ്ക്കും കൂടുതല്‍ വിമാനസര്‍വീസുകള്‍ ആരംഭിക്കാനുള്ള നടപടികള്‍ സ്വീകരിക്കും.

സര്‍ക്കാര്‍ പണം എടുക്കാതെ ടൂറിസം രംഗത്തെ സ്വയം വികസനത്തിനുള്ള പ്രേരകശക്തിയാക്കി മാറ്റുകയെന്നതാണ് ടൂറിസം വകുപ്പിന്റെ പ്രധാനലക്ഷ്യമെന്നും മന്ത്രി തോമസ് പറഞ്ഞു.