ശമ്പളം കൊടുക്കാന് 200 കോടി കടമെടുത്തു
തിരുവനന്തപുരം: സര്ക്കാര് ജീവനക്കാര്ക്കും അദ്ധ്യാപകര്ക്കും മെയ് മാസത്തെ ശമ്പളം നല്കുന്നതിനായി സംസ്ഥാന സര്ക്കാര് 200 കോടി രൂപ കടമെടുത്തു. ശമ്പളം നല്കുന്നതിനും മറ്റു ദൈനംദിന ചെലവുകള്ക്കുമായി റിസര്വ് ബാങ്കില് നിന്നുമെടുത്ത 175 കോടി രൂപയുടെ ഓവര്ഡ്രാഫ്റ്റിനു പുറമേയാണ് ഈ കടം.
സംസ്ഥാന ബിവറേജസ് കോര്പറേഷനെ കൊണ്ട് സ്റ്റേറ്റ് ബാങ്ക് ഓഫ് ഇന്ത്യയില് നിന്നും വായ്പയെടുപ്പിച്ചാണ് സര്ക്കാര് 200 കോടി സമാഹരിച്ചത്. 5000 കോടിയോളം രൂപ യുടെ കടത്തില് മുങ്ങി നില്ക്കുന്ന സര്ക്കാരിന് ഇനിയും വായ്പ നല്കാന് പൊതുമേഖലാ ബാങ്കുകളും സഹകരണ ബാങ്കുകളും വിവിധ ക്ഷേമനിധി ബോര്ഡുകളും തയ്യാറാകാതിരുന്നതിനെത്തുടര്ന്നാണ് ബിവറേജസ് കോര്പറേഷനെ കൊണ്ട് 200 കോടി കടമെടുപ്പിച്ചത്.
സംസ്ഥാന ജീവനക്കാര്ക്കും അദ്ധ്യാപകര്ക്കും ശമ്പളം നല്കാന് 300 കോടി രൂപയായിരുന്നു സര്ക്കാരിന് വേണ്ടിയിരുന്നത്. ഓവര്ഡ്രാഫ്റ്റ് ഇനത്തില് 175 കോടി രൂപ നല്കാനേ റിസര്വ് ബാങ്ക് തയ്യാറായുള്ളൂ. ഈ തുക ശമ്പളം നല്കാന് പോലും തികയില്ലെന്ന് കണ്ടാണ് സര്ക്കാര് പൊതുമേഖലയില് ഏറ്റവും കൂടുതല് ലാഭമുണ്ടാക്കുന്ന സംസ്ഥാന ബിവറേജസ് കോര്പറേഷന്റെ സഹായം തേടിയത്.