പി ഇ ഉഷക്കേസ്: പരാതി കമ്മിറ്റി ഉണ്ടാക്കാന് നിര്ദ്ദേശം
കൊച്ചി: കലിക്കറ്റ് സര്വകലാശാല ജീവനക്കാരി പി ഇ ഉഷയെ ജോലിസ്ഥലത്ത് അപവാദംപ്രചാരണം നടത്തി പീഡിപ്പിച്ചുവെന്ന കേസില് സര്വകലാശാലയില് പരാതി കമ്മിറ്റി രൂപീകരിക്കാന് കേരള ഹൈക്കോടതി സര്വകലാശാലയ്ക്ക് ഉത്തരവ് നല്കി. വിശാഖക്കേസില് സുപ്രീംകോടതി നിര്ദ്ദേശിച്ചതു പ്രകാരമുള്ള പരാതി കമ്മിറ്റി പത്തു ദിവസത്തിനകം രൂപീകരിക്കാനാണ് കോടതി നിര്ദ്ദേശം.
സര്വകലാശാലയ്ക്കു വേണ്ടി വൈസ്ചാന്സലര് നല്കിയ സത്യവാങ്മൂലത്തില് അതൃപ്തി രേഖപ്പെടുത്തിക്കൊണ്ടാണ് ചീഫ് ജസ്റ്റീസ് കെ കെ ഉഷയും ജസ്റ്റീസ് കുര്യന് ജോസഫുമടങ്ങുന്ന ഡിവിഷന് ബഞ്ച് ജൂണ് 11 തിങ്കളാഴ്ച ഈ ഉത്തരവ് പുറപ്പെടുവിച്ചത്.
യു ജി സി നിര്ദ്ദേശപ്രകാരം വിദ്യാര്ത്ഥിനികളെ കൂടെ ഉള്പ്പെടുത്തിയ പരാതി കമ്മിറ്റി രൂപീകരിക്കുകയും സഹപ്രവര്ത്തകനായ പ്രകാശന് ഉഷയ്ക്കെതിരേ അപവാദപ്രചാരണം നടത്തിയെന്ന ആരോപണത്തെക്കുറിച്ച് അന്വേഷിയ്ക്കുകയും ചെയ്തതായി സര്വകലാശാല നല്കിയ സത്യവാങ്മൂലത്തില് പറഞ്ഞിരുന്നു. വിശാഖ കേസിലെ സുപ്രീംകോടതി നിര്ദ്ദേശപ്രകാരമുള്ള കമ്മിറ്റി രൂപീകരിക്കണമെന്ന സര്ക്കാര് നിര്ദ്ദേശം സിണ്ടിക്കേറ്റിന്റെ പരിഗണനയ്ക്കായി സമര്പ്പിച്ചിട്ടുണ്ടെന്നും ജൂണ് അവസാനം ചേരുന്ന സിണ്ടിക്കേറ്റ് നിര്ദ്ദേശം പരിഗണിയ്ക്കുമെന്നുമായിരുന്നു വൈസ്ചാന്സലര് നല്കിയ സത്യവാങ്മൂലത്തില് പറഞ്ഞിരുന്നത്.