ദീപേന്ദ്രയും ദേവയാനിയും വിവാഹിതരായിരുന്നു

ലണ്ടന്‍: നേപ്പാളിലെ കിരീടാവകാശി ദീപേന്ദ്ര രാജകുമാരനും ഇന്ത്യയിലെ സിന്ധ്യ കുടുംബത്തില്‍പ്പെട്ട ദേവയാനി റാണയും നേപ്പാള്‍ കൂട്ടക്കൊലയ്ക്കു മുമ്പുതന്നെ വിവാഹിതരായിരുന്നുവെന്ന് ഇംഗ്ലീഷ് മാഗസിനായ ന്യൂസ് വീക്ക് റിപ്പോര്‍ട്ടു ചെയ്തു.

ടിക്ക ആചാരപ്രകാരമാണത്രെ ദീപേന്ദ്ര ദേവയാനിയെ വിവാഹം കഴിച്ചത്. എന്നാല്‍ ഈ ആചാരം നേപ്പാളില്‍ അംഗീകാരമുള്ളതായിരുന്നില്ല - ദേവയാനിയുടെ ചില ബന്ധുക്കളെ ഉദ്ധരിച്ചുകൊണ്ട് മാഗസിന്‍ റിപ്പോര്‍ട്ടു ചെയ്തു.

അതേസമയം ദേവയാനിയെക്കുറിച്ചുള്ള അഭ്യൂഹങ്ങള്‍ പലയിടത്തും പരക്കുകയാണ്. റഷ്യയിലെ അധോലോകസംഘവുമായി ദേവയാനിക്ക് ബന്ധമുണ്ടെന്നും ആ ബന്ധമാണ് നേപ്പാള്‍ കൂട്ടക്കൊലയിലേക്ക് നയിച്ചതെന്നുമാണ് ഒരു അഭ്യൂഹം. ഇത്തരം അഭ്യൂഹങ്ങള്‍ റാണാ കുടുംബത്തെ ആകെ വിഷമിപ്പിച്ചിരിക്കുകയാണ്.

എന്നാല്‍ ദേവയാനി ദീപേന്ദ്രയുമായി അഗാധമായ പ്രേമത്തിലൊന്നും ആയിരുന്നില്ലെന്ന് അവരുടെ മുന്‍ സുഹൃത്തുക്കള്‍ പറഞ്ഞു. കൂടാതെ ദേവയാനിക്ക് ദീപേന്ദ്രയേക്കാള്‍ പ്രായമുണ്ടായിരുന്നുവെന്നും കൂട്ടുകാരികള്‍ പറയുന്നു.