പിള്ളയെ അനുനയിപ്പിക്കാന്‍ ശ്രമം

തിരുവനന്തപുരം: ഇടഞ്ഞുനില്‍ക്കുന്ന മുന്‍ മന്ത്രി ആര്‍. ബാലകൃഷ്ണപ്പിള്ളയെ അനുനയിപ്പിക്കാന്‍ യുഡിഎഫ് ശ്രമമാരംഭിച്ചു.

ഇതിന്റെ ഭാഗമായി കെപിസിസി പ്രസിഡണ്ട് കെ. മുരളീധരന്‍, യുഡിഎഫ് കണ്‍വീനര്‍ ഉമ്മന്‍ ചാണ്ടി, മന്ത്രി പി.കെ. കുഞ്ഞാലിക്കുട്ടി എന്നിവര്‍ പിള്ളയുമായി സംസാരിച്ചു. കരുണാകരന്റെ പ്രത്യേകതാല്പര്യപ്രകാരമാണ് പുതിയ നീക്കം. പിള്ളയുടെ പ്രശ്നങ്ങള്‍ പരിഹരിക്കാന്‍ മൂന്ന് പ്രമുഖ നേതാക്കളെ നിയോഗിക്കാന്‍ ജൂണ്‍ 13 ബുധനാഴ്ച ചേര്‍ന്ന യുഡിഎഫ് യോഗം തീരുമാനിച്ചിരുന്നു.

പിള്ളയെ മന്ത്രിസഭയില്‍ ഉള്‍പ്പെടുത്താത്തതിനെ കരുണാകരന്‍ തുറന്ന് വിമര്‍ശിക്കുകയായിരുന്നു. യുഡിഎഫ് രൂപീകരിക്കുന്നതില്‍ പ്രധാനപങ്ക് വഹിച്ച പിള്ളയ്ക്ക് അര്‍ഹിക്കുന്ന സ്ഥാനം നല്‍കണമെന്നും ചില യുഡിഎഫ് നേതാക്കള്‍ വാദിച്ചു. തമിഴ്നാട്ടില്‍ ജയലളിതയെ പിന്തുണയ്ക്കാമെങ്കില്‍ ഇവിടെ തന്റെ നേതാവിന് മന്ത്രിസ്ഥാനം നല്‍കുന്നതില്‍ കോണ്‍ഗ്രസ് വിമുഖത കാട്ടുന്നതെന്തിനാണ് എന്നാണ് കേരളാകോണ്‍ഗ്രസ് ബിയെ പ്രതിനിധീകരിച്ച് യുഡിഎഫ് യോഗത്തിനെത്തിയ വേണുഗോപാലന്‍ നായര്‍ ചോദിച്ചത്.

പിള്ള സുപ്രീംകോടതിയില്‍ കേസ് ജയിച്ചുവന്നാല്‍ മന്ത്രിസ്ഥാനം നല്കാമെന്നാണ് മുഖ്യമന്ത്രി എ.കെ. ആന്റണിയുടെ നിലപാട്. എന്നാല്‍ കരുണാകരനും പിള്ളയ്ക്ക് പിന്തുണ പ്രഖ്യാപിച്ചതോടെ പിള്ളപ്രശ്നം ആന്റണിക്ക് തലവേദനയാകുമെന്ന് ഉറപ്പാണ്.