ധവളപത്രം: പ്രത്യേക മന്ത്രിസഭായോഗം ഇന്ന്

തിരുവനന്തപുരം: സംസ്ഥാനത്തിന്റെ സാമ്പത്തിക സ്ഥിതിയെക്കുറിച്ചുള്ള ധവളപത്രം പുറപ്പെടുവിക്കുന്നതിനായി ജൂണ്‍ 18 തിങ്കളാഴ്ച പ്രത്യേക മന്ത്രിസഭായോഗം ചേരും.

സംസ്ഥാനത്തിന് 5,000 കോടി രൂപയുടെ കുടിശികയുണ്ടെന്ന് ധവളപത്രം തയ്യാറാക്കുന്ന ഉപസമിതി കണ്ടെത്തിയിട്ടുണ്ട്. 2,700 കോടി രൂപയുടെ പൊതുകടവും ഉള്ളതായി ധനമന്ത്രി കെ. ശങ്കരനാരായണന്‍ അധ്യക്ഷനായുള്ള സമിതി കണ്ടെത്തിയതായി അറിയുന്നു.

പ്രതീക്ഷിച്ചതിനേക്കാളും വലിയ കടക്കെണിയിലാണ് സംസ്ഥാന പെട്ടിരിക്കുന്നതെന്ന് ജൂണ്‍ 17 ഞായറാഴ്ച മുഖ്യമന്ത്രി എ.കെ. ആന്റണി വ്യക്തമാക്കി. ധവളപത്രത്തെക്കുറിച്ച് തിരുവനന്തപുരത്തും കൊച്ചിയിലും കോഴിക്കോട്ടും ചര്‍ച്ചകള്‍ സംഘടിപ്പിക്കുമെന്നും ആന്റണി പറഞ്ഞു. സാധാരണക്കാരനെ ബുദ്ധിമുട്ടിക്കാത്ത തരത്തിലായിരിക്കും സാമ്പത്തികപ്രതിസന്ധിയില്‍ നിന്നും കരകയറാനുള്ള നടപടികളെന്ന് അദ്ദേഹം ഉറപ്പുനല്‍കി.

കഴിഞ്ഞ മൂന്ന് മന്ത്രിസഭായോഗങ്ങളിലും ധവളപത്രത്തെക്കുറിച്ച് ചര്‍ച്ച നടത്തിയിരുന്നെങ്കിലും അന്തിമരൂപമായിരുന്നില്ല. ധവളപത്രം മന്ത്രിസഭായോഗത്തിന് ശേഷം പ്രഖ്യാപിക്കാതെ നിയമസഭയില്‍ വച്ചാല്‍ മതിയെന്ന അഭിപ്രായം യുഡിഎഫിനുള്ളില്‍ത്തന്നെ ഉയര്‍ന്നിട്ടുണ്ട്. ധവളപത്രം പുറത്തിറക്കിയ ശേഷം പല മേഖകളിലും വിലവര്‍ദ്ധനയുണ്ടാകുമെന്നും സൂചനയുണ്ട്.