ധവളപത്രം പുറത്തിറക്കി

തിരുവനന്തപുരം: സംസ്ഥാന സര്‍ക്കാരിന്റെ സാമ്പത്തിക സ്ഥിതിയെക്കുറിച്ചുള്ള ധവളപത്രം പുറത്തിറക്കി. ജൂണ്‍ 18 തിങ്കളാഴ്ച മുഖ്യമന്ത്രി എ.കെ. ആന്റണിയാണ് ധവളപത്രം ഔദ്യോഗികമായി പുറത്തിറക്കിയത്.

ധവളപത്രം ചര്‍ച്ചയ്ക്ക് വേണ്ടിയുള്ള രേഖ മാത്രമാണെന്നും അതിലെ നിര്‍ദ്ദേശങ്ങള്‍ മന്ത്രിസഭാ തീരുമാനമല്ലെന്നും ധവളപത്രം പുറത്തിറക്കിക്കൊണ്ട് മുഖ്യമന്ത്രി വ്യക്തമാക്കി. പ്രതിസന്ധി പരിഹരിക്കാന്‍ ഉപസമിതി മുന്നോട്ടുവച്ച നടപടികള്‍ മന്ത്രിസഭയുടെ തീരുമാനങ്ങളല്ല. ധവളപത്രം ജനകീയകോടതി മുമ്പാകെ സമര്‍പ്പിക്കുകയാണ്.

അടുത്തുതന്നെ ചില കാര്യങ്ങളില്‍ അടിയന്തിര നടപടി എടുക്കേണ്ടിവരും. എന്നാല്‍ ഇതും വിശദമായ ചര്‍ച്ചകള്‍ക്ക് ശേഷം മാത്രമായിരിക്കുമെന്ന് ആന്റണി വ്യക്തമാക്കി.

സര്‍ക്കാരിനെ കടക്കെണിയില്‍ നിന്നും രക്ഷിക്കാനുള്ള നിര്‍ദ്ദേശങ്ങളാണ് ധവളപത്രത്തിലുള്ളത്. ജനങ്ങളില്‍ നിന്നും മറച്ചുവച്ച് ഒന്നും ചെയ്യാനാഗ്രഹിക്കുന്നില്ല. സാമ്പത്തിക പ്രതിസന്ധി ഗുരുതരമാണെങ്കിലും സംസ്ഥാനത്തെ രക്ഷിക്കാന്‍ കഴിയുമെന്ന് വിശ്വാസമുണ്ടെന്ന് മുഖ്യമന്ത്രി പറഞ്ഞു.